ເມື່ອບໍ່ດົນຜ່ານມານີ້, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ພ້ອມດ້ວຍຄະນະນຳແຂວງ ໄດ້ເດີນທາງໄປຮ່ວມ ພິທີໄຂສົກຮຽນໃໝ່ 2025-2026 ພ້ອມທັງມອບຊຸດນັກຮຽນ ແລະ ອຸປະກອນການຮຽນ -ອຸປະກອນກິລາ ໃຫ້ໂຮງຮຽນແຫ່ງຕ່າງໆ ທີ່ນອນໃນເຂດຈຸດສຸມລາດຫໍ້, ຈຸດສຸມຜາບັງ ແລະ ກຸ່ມບ້ານຈຽງຕູບເມືອງ ເຊໂປນ ໂດຍການນຳພາທາງ ຂອງທ່ານ ພົງຄຳຮັກ ບຸດທະວົງ ກຳມະການພັກແຂວງ ເລຂາພັກເມືອງເຊໂປນ ພ້ອມຄະນະ, ມີຫົວໜ້າຈຸດສຸມ, ຄະນະພັດທະນາການສຶກສາຂັ້ນບ້ານ, ອຳນາດການປົກຄອງບ້ານ, ຜູ້ອຳນວຍການໂຮງຮຽນ, ຄູ-ອາຈານ, ພໍ່ແມ່ຜູ້ປົກຄອງ ແລະ ລູກຫຼານນັກຮຽນເຂົ້າຮ່ວມຕ້ອນຮັບຢ່າງຫຼວງຫຼາຍ.

ໂອກາດນີ້, ທ່ານເຈົ້າແຂວງສະຫວັນນະເຂດ ໄດ້ຮັບຟັງການລາຍງານສະພາບການຕົວຈິງ ລວມທັງຄຳສະເໜີຂອງໂຮງຮຽນແຕ່ລະແຫ່ງພາຍໃນຈຸດສຸມລາດຫໍ້, ຈຸດສຸມຜາບັງ ແລະ ກຸ່ມບ້ານຈຽງຕູບ. ຈາກນັ້ນ, ທ່ານເຈົ້າແຂວງ ພ້ອມຄະນະ ກ່ໄດ້ແຈກຢາຍຊຸດນັກຮຽນ (ຍິງ-ຊາຍ) ແລະ ອຸປະກອນການຮຽນໃຫ້ແກ່ລູກຫຼານນັກຮຽນຂອງໂຮງຮຽນປະຖົມ ແລະ ມັດທະຍົມລາດຫໍ້ຈຳນວນທັງໝົດ 223 ຊຸດ, ຍິງ 101 ຊຸດ, ມອບໃຫ້ໂຮງຮຽນປະຖົມກະດໍ ແລະ ມັດທະຍົມຕົ້ນຜາບັງຈຳນວນ 184 ຊຸດ, ຍິງ 101 ຊຸດ ແລະ ມອບໃຫ້ໂຮງຮຽນປະຖົມສົບສະລູ+ຕະລົວະ ແລະ ມັດທະຍົມຕົ້ນຈຽງຕູບຈຳນວນ 129 ຊຸດ, ຍິງ 56 ຊຸດ ພ້ອມທັງໄດ້ມອບງົບປະມານຈໍານວນ 10 ລ້ານກີບ ເພື່ອຊຸກຍູ້ວຽກງານການສຶກສາ ກໍຄືການໄຂສົກຮຽນໃໝ່ 2025-2026 ໃຫ້ແກ່ໂຮງຮຽນຂອງທັງສາມຈຸດສຸມດັ່ງກ່າວ.

ພ້ອມດຽວກັນນີ້, ທ່ານ ບຸນໂຈມ ອຸບົນປະເສີດ ພ້ອມຄະນະ ກໍຍັງໄດ້ລົງຕິດຕາມເບິ່ງສະພາບອາຄານຮຽນ, ຫໍພັກຄູ ແລະ ນັກຮຽນ ລວມເຖິງສິ່ງອຳນວຍຄວາມສະດວກຕ່າງໆພາຍໃນໂຮງຮຽນແຕ່ລະແຫ່ງ ຊຶ່ງເຫັນວ່າໂດຍລວມແລ້ວ, ການກະກຽມຮອບດ້ານແກ່ການໄຂສົກຮຽນໃໝ່ປີນີ້ ແມ່ນປະຕິບັດໄດ້ດີ, ແຕ່ກໍຍັງມີຄວາມຫຍຸ້ງຍາກຫຼາຍດ້ານທີ່ຕ້ອງໄດ້ມີການປັບປຸງຄືນໃໝ່, ໂດຍທ່ານເຈົ້າແຂວງ ກໍໄດ້ໃຫ້ທິດຊີ້ນຳ ແລະ ໃຫ້ການຊ່ວຍເຫຼືອໃນການແກ້ໄຂບັນຫາຄວາມຫຍຸ້ງຍາກຕ່າງໆຂອງໂຮງຮຽນແຕ່ລະແຫ່ງ ໂດຍໃຫ້ທາງໂຮງຮຽນ ສະເໜີຂຶ້ນມາຫາແຂວງ ເພື່ອຂຸ້ນຂ້ຽວປັບປຸງແກ້ໄຂໂດຍໄວ.

ການລົງເຄື່ອນໄຫວແແຕ່ລະຈຸດຄັ້ງນີ້, ທ່ານເຈົ້າແຂວງ ໄດ້ໂອ້ລົມລູກຫຼານນັກຮຽນ ໂດຍທ່ານໄດ້ເນັ້ນສຳຄັນບໍ່ໃຫ້ມີການປະລະການຮຽນເດັດຂາດ, ໃຫ້ພ້ອມກັນຕັ້ງໜ້າໃນການສຶກສາຮ່ຳຮຽນໃຫ້ຈົບຊັ້ນ ມ4 ຫຼື ມ7 ເພື່ອຈະໄດ້ໄປຮຽນຕໍ່ວິຊາຊີບຕ່າງໆ ໂດຍແຂວງພ້ອມໃຫ້ການສະໜັບສະໜູນຢ່າງເຕັມທີ່. ພ້ອມນີ້, ທ່ານເຈົ້າແຂວງ ຍັງໄດ້ເນັ້ນສຳຄັນຕໍ່ພໍ່ແມ່ຜູ້ປົກຄອງ ໃຫ້ເຂົ້າໃຈຄວາມໝາຍສຳຄັນຂອງວຽກງານການສຶກສາ ພ້ອມທັງເອົາໃຈໃສ່ຊຸກຍູ້ລູກຫຼານເຂົ້າໂຮງຮຽນຕາມເກນອາຍຸ ເພື່ອໃຫ້ເຂົາເຈົ້າມີຄວາມຮູ້ຄວາມສາມາດ, ມີອະນາຄົດທີ່ດີ ເພື່ອມາພັດທະນາຕົນເອງ ແລະ ຄອບຄົວໃຫ້ດີຂຶ້ນກວ່າເກົ່າ.

(ແຫຼ່ງຂ່າວ: ແຂວງສະຫວັນນະເຂດ)

ສະແດງຄຳຄິດເຫັນ