ກະຊວງປ້ອງກັນປະເທດ ໄດ້ກຳນົດເອົາ 21 ປະເພດກິລາ ເຂົ້າຮ່ວມໃນງານມະຫາກຳກິລາແຫ່ງຊາດ ຄັ້ງທີ XII 2025 ທີ່ນະຄອນຫຼວງວຽງຈັນ ຫຼື ນະຄອນຫຼວງວຽງຈັນ ເກມ 2025 ຈະໄດ້ຈັດຂຶ້ນໃນລະຫວ່າງວັນທີ 15-25 ພະຈິກ 2025.

ທ່ານ ພັນເອກ ແສງອໍາພອນ ພູມີເງິນ ຮອງຫົວໜ້າກົມອົບຮົມ ກົມໃຫຍ່ເສນາທິການກອງທັບ ໄດ້ກ່າວໃນກອງປະຊຸມ ຜ່ານແຜນການກະກຽມນັກກິລາ ເຂົ້າຮ່ວມງານກິລາ ຄັ້ງນີ້ ເມື່ອບໍ່ດົນມານີ້ວ່າ, ງານກິລາແຫ່ງຊາດ ຄັ້ງທີ XII ນີ້ ເຈົ້າພາບ ນະຄອນຫຼວງວຽງຈັນ ໄດ້ກໍານົດ 33 ປະເພດກິລາ ຮ່ວມແຂ່ງຂັນ ແຕ່ກະຊວງປ້ອງກັນປະເທດ ຈະສົ່ງນັກກິລາເຂົ້າຮ່ວມ 21 ປະເພດ: ບານເຕະຊາຍ, ແລ່ນ-ລານ, ບານສົ່ງໃນຮົ່ມ ແລະ ຫາດຊາຍ, ມວຍສາກົນ, ມວຍຢູໂດ, ເທຄວັນໂດ, ມວຍປໍ້າ, ປັນຈັກສີລັດ, ຄາຣາເຕໂດ, ມວຍລາວ, ຍິງປືນ, ກະຕໍ້-ຊິນລອນ, ເປຕັງ, ກັອຟ, ສະນຸກເກີ, ກິລາໜ້າເກັກ, ຍິງທະນູ, ດຶງເຊືອກ, ກິລາໝາກຂ່າງ, ກິລາໝາກແລ້ ແລະ ເຮືອຊ່ວງ.

ພ້ອມນັ້ນ, ຈຸດປະສົງໃນການຈັດກອງປະຊຸມໃນຄັ້ງນີ້ ຍັງໄດ້ສ້າງແຜນການກະກຽມນັກກິລາ ຢ່າງມີຂະບວນການຟົດຟື້ນ, ເຂັ້ມແຂງ, ໜັກແໜ້ນ, ມີຄຸນນະພາບ, ສາມາດປະກອບສ່ວນຮັບໃຊ້ຊາດ, ເຂົ້າຮ່ວມແຂ່ງຂັນລະດັບພາກພື້ນ ແລະ ສາກົນ ທັງເປັນການສ້າງໂອກາດໃຫ້ບັນດານາຍ ແລະ ພົນທະຫານ ກຳລັງຫຼວງ-ກໍາລັງທ້ອງຖິ່ນ ໃນທົ່ວກອງທັບ ປະຊາຊົນລາວ ຜູ້ທີ່ມີພອນສະຫວັນ, ມີຄວາມສາມາດທາງດ້ານການກິລາ ໄດ້ຮັບໂອກາດເປັນຕົວແທນເຂົ້າຮ່ວມແຂ່ງຂັນໃນງານກິລາລະດັບຊາດ, ລະດັບພາກພື້ນ ແລະ ສາກົນ ໃນອະນາຄົດ.

ສໍາລັບ ຜົນງານຂອງກະຊວງປ້ອງກັນປະເທດ ໃນງານມະຫາກຳກິລາແຫ່ງຊາດ ຄັ້ງທີ XI 2022 ຜ່ານມາ ທີ່ແຂວງຊຽງຂວາງ (ເຈົ້າພາບ), ສາມາດຍາດໄດ້ ຫຼຽນຄໍາ 51 ຫຼຽນ, ຫຼຽນເງິນ 49 ຫຼຽນ ແລະ ຫຼຽນທອງ 36 ຫຼຽນ ລວມ 136 ຫຼຽນ ໄດ້ເປັນອັນດັບທີ 3, ສ່ວນອັນດັບ1 ເຈົ້າພາບ ຊຽງຂວາງ ຍາດມາໄດ້ 62 ຫຼຽນຄຳ, 60 ຫຼຽນເງິນ ແລະ 95 ຫຼຽນທອງ ລວມ 217 ຫຼຽນ.

ທີ່ມາ: Lao National TV

ສະແດງຄຳຄິດເຫັນ