ໃນ 8 ເດືອນ​ຂອງ​ປີ 2025 ນີ້ ມີ​ນັກ​ທ່ອງ​ທ່ຽວ​ຕ່າງ​ປະ​ເທດ​ເຂົ້າ​ມາ ສ​ປ​ປ ລາວ ຫຼາຍກວ່າ 3 ລ້ານ​ເທື່ອ​ຄົນ, ເພີ່ມ​ຂຶ້ນ 15% ເມື່ອ​ທຽບ​ໃສ່​ໄລ​ຍະ​ດຽວ​ກັນ​ຂອງ​ປີ​ຜ່ານ​ມາ, ໂດຍ​ນັກ​ທ່ອງ​ທ່ຽວ​ຈາກ​ໄທ​ເປັນ​ອັນ​ດັບ 1, ຮອງ​ລົງ​ມາ​ແມ່ນ​ຫວຽດ​ນາມ ແລະ ຈີນຕາມ​ລຳ​ດັບ.

ອີງ​ຕາມ​ຂໍ້​ມູນ​ຈາກກົມພັດທະນາການທ່ອງທ່ຽວ ກະຊວງວັດທະນະທຳ ແລະ ການທ່ອງທ່ຽວໃຫ້​ຮູ້​ວ່າ: ໂຕເລກສະຖິຕິນັກທ່ອງທ່ຽວຕ່າງປະເທດເຂົ້າມາທ່ຽວ ສປປ ລາວ ເດືອນມັງກອນ – ສິງຫາ ຫຼື ໃນ 8 ເດືອນ ​ຂອງປີ 2025 ເພີ່ມຂຶ້ນ 15% ເມື່ອ​ທຽບ​ໃສ່ປີຜ່ານມາດ້ວຍຈຳນວນນັກທ່ອງທ່ຽວ ຫຼາຍກວ່າ 3 ລ້ານ ເທື່ອຄົນ.

ກຸ່ມນັກທ່ອງທ່ຽວອາຊຽນຍັງເປັນຕະຫຼາດຫຼັກ ທີ່ເຂົ້າມາທ່ຽວ ສປປ ລາວ, ໃນນີ້ນັກ​ທ່ອງ​ທ່ຽວ​ຈາກປະເທດໄທເປັນອັນດັບ 1 ມີຈຳນວນ 977,675 ເທື່ອຄົນ, ຮອງລົງມາແມ່ນຫວຽດນາມ ມີ 790,403 ເທື່ອ ແລະ ຈີນ 750,650 ເທື່ອຄົນ.

ນອກນັ້ນ, ກໍມີ ສາທາລະນະລັດ ເກົາຫຼີ 1 ແສນກວ່າເທື່ອຄົນ, ສະຫະລັດ ອາເມຣິກາ 49 ພັນກວ່າເທື່ອຄົນ ແລະ ຣັດເຊຍ 49 ພັນກວ່າເທື່ອຄົນ.

ແຂວງທີ່ມີນັກທ່ອງທ່ຽວມາທ່ຽວຫຼາຍທີ່ສຸດແມ່ນນະຄອນຫຼວງວຽງຈັນ, ແຂວງວຽງຈັນ, ແຂວງຫຼວງພະບາງ ແລະ ແຂວງຈຳປາສັກ.

ທັງ​ນີ້, ສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຈາກນັກທ່ອງທ່ຽວຕ່າງ​ປະ​ເທດຫຼາຍກວ່າ​ໝູ່ ແມ່ນການທ່ອງທ່ຽວທາງດ້ານທຳມະຊາດ ແລະ ວັດທະນະທຳ.

ພາບ: ຕຸ​ໄລ​ເພັດ

ສະແດງຄຳຄິດເຫັນ