ກອງປະຊຸມປິດ ໂຄງການສ້າງແຜນກິດຈະກໍາ ພັດທະນາຊົນນະບົດ ເພື່ອສ້າງລາຍຮັບໃຫ້ຊົນນະບົດ ຢູ່ບັນດາແຂວງພາກເໜືອ ແລະ ພາກກາງ ຂອງ ສປປ ລາວ ຈັດຂຶ້ນໃນວັນທີ 16 ກັນຍາ 2025 ຜານມາ ໂດຍການເປັນປະທານຮ່ວມຂອງ ທ່ານ ໄຊນະຄອນ ອິນທະວົງ ຮອງລັດຖະມົນຕີກະຊວງກະສິກໍາ ແລະ ສິ່ງແວດລ້ອມ, ທ່ານ ຈອງ ຢອງຊູ ເອກອັກຄະລັດຖະທູດ ສ ເກົາຫລີ ປະຈໍາ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ໄຊນະຄອນ ອິນທະວົງ ໄດ້ກ່າວວ່າ: ໂຄງການສ້າງແຜນກິດຈະກໍາ ພັດທະນາຊົນນະບົດ ເພື່ອສ້າງລາຍຮັບໃຫ້ຊົນນະບົດ ເປັນໂຄງການໜຶ່ງທີ່ນອນໃນຂອບການຮ່ວມມື ລະຫວ່າງ ລັດຖະບານລາວ ແລະ ລັດຖະບານ ສ ເກົາຫລີ ແນໃສ່ພັດທະນາເສດຖະກິດ-ສັງຄົມ ຂອງ ສປປ ລາວ, ງົບປະມານທັງໝົດ 12,5 ລ້ານໂດລາສະຫະລັດ ເຊິ່ງໄລຍະການຈັດຕັ້ງປະຕິບັດ 5 ປີ (2021-2025) ກວມເອົາ 14 ບ້ານ ຂອງ 3 ແຂວງເປົ້າໝາຍຄື: ແຂວງຊຽງຂວາງ, ວຽງຈັນ ແລະ ແຂວງບໍລິຄໍາໄຊ. ຜ່ານການຈັດຕັ້ງປະຕິບັດ 5 ປີຜ່ານມາ ເຫັນວ່າສອດຄ່ອງກັບແຜນການພັດທະນາເສດຖະກິດ-ສັງຄົມແຫ່ງຊາດ ກໍຄື ແຜນງານຂອງກະຊວງກະສິກຳ ແລະ ສິ່ງແວດລ້ອມ ໂດຍສະເພາະ ແມ່ນແຜນງານຜະລິດເປັນສິນຄ້າ ແລະ ແຜນງານພັດທະນາຊົນນະບົດ-ແກ້ໄຂຄວາມທຸກຍາກ. ໂຄງການດັ່ງກ່າວ, ໄດ້ສະໜັບສະໜູນກະຊວງກະສິກໍາ ແລະ ສິ່ງແວດລ້ອມ ໃນການສ້າງແຜນດໍາເນີນງານການຍູ້ໜູນການຜະລິດເປັນສິນຄ້າ ໂດຍສະເພາະ ເຂົ້າ, ພືດຜັກ ແລະ ງົວ, ໄດ້ປັບປຸງສະພາບແວດລ້ອມ ການດໍາລົງຊີວິດຂອງປະຊາຊົນ ພາຍໃນບ້ານເປົ້າໝາຍໂຄງການ ເຮັດໃຫ້ຊີວິດການເປັນຢູ່ດີຂຶ້ນກວ່າເກົ່າ, ມີລາຍຮັບເພີ່ມຂຶ້ນ, ມີຕະຫລາດຮອງຮັບ ໃນການຂາຍຜະລິດຕະພັນກະສິກຳ ຂອງກະສິກອນ.

ນອກຈາກນີ້, ຜູ້ເຂົ້າຮ່ວມຍັງໄດ້ຮັບຟັງ ການລາຍງານຜົນສໍາເລັດຂອງໂຄງການໂດຍລວມ, ການຈັດຕັ້ງປະຕິບັດໂຄງການຂັ້ນແຂວງ ແລະ ບ້ານ, ຮັບຟັງລາຍງານຜົນສໍາເລັດຂອງສູນບໍລິການເຕັກນິກກະສິກໍາ ແລະ ພັດທະນາຊົນນະບົດລາວ-ເກົາຫລີ, ບົດບາດໜ້າທີ່ຂອງສູນແຂວງ. ໃນພິທີດັ່ງກ່າວ, ຍັງໄດ້ມີການມອບ-ຮັບສູນ ໃຫ້ພະແນກກະສິກໍາ ແລະ ສິ່ງແວດລ້ອມແຂວງ ທີ່ຢູ່ໃນເປົ້າໝາຍໂຄງການຕື່ມອີກ.

ຂ່າວ-ພາບ: ສອນເພັດ ສຸລິພອນ

ສະແດງຄຳຄິດເຫັນ