ສະຕາບັກ (Starbucks) ເຄືອຂ່າຍຮ້ານກາເຟຍັກໃຫຍ່ຂອງໂລກ ໄດ້ປະກາດຂາຍຫຸ້ນສ່ວນໃຫຍ່ 60% ໃນທຸລະກິດຄ້າປີກໃນປະເທດຈີນ ໃຫ້ແກ່ບໍລິສັດລົງທຶນ Boyu Capital ໃນຂໍ້ຕົກລົງມູນຄ່າ 4 ພັນລ້ານໂດລາສະຫະລັດ (ປະມານ 1.3 ແສນລ້ານບາດ) ເພື່ອເສີມຄວາມແຂງແຮງແລະເຮັດໃຫ້ການເຕີບໂຕໃນຕະຫຼາດຈີນໄວຂຶ້ນ ໃນຂະນະທີ່ການແຂ່ງຂັນກຳລັງຮຸນແຮງ.

ພາຍໃຕ້ຂໍ້ຕົກລົງນີ້ ສະຕາບັກຈະຍັງຖືຫຸ້ນ 40% ໃນທຸລະກິດຄ້າປີກໃນຈີນ ແລະຍັງຄົງເປັນເຈົ້າຂອງຍີ່ຫໍ້ສະຕາບັກທັງໝົດໃນປະເທດຈີນຕໍ່ໄປ. ຂໍ້ຕົກລົງນີ້ສະທ້ອນມູນຄ່າທຸລະກິດຄ້າປີກຂອງສະຕາບັກໃນຈີນທີ່ສູງເຖິງ 13,000 ລ້ານໂດລາສະຫະລັດ.

ຈີນເປັນຕະຫຼາດທີ່ໃຫຍ່ອັນດັບສອງຂອງສະຕາບັກຮອງຈາກສະຫະລັດ. ສະຕາບັກເຂົ້າສູ່ຕະຫຼາດຈີນໃນປີ 1999 ແລະປັດຈຸບັນມີຮ້ານກາເຟປະມານ 8,000 ແຫ່ງ ແລະຕັ້ງເປົ້າຫມາຍຂະຫຍາຍເພີ່ມເປັນ 20,000 ແຫ່ງໃນອະນາຄົດ.

ສະຕາບັກລະບຸວ່າ ຄວາມຮ່ວມມືກັບ Boyu Capital ຊຶ່ງເປັນບໍລິສັດໄພຣເວດອີຄິວຕີ້ທີ່ເຂົ້າໃຈພຶດຕິກຳຜູ້ບໍລິໂພກຊາວຈີນຢ່າງລຶກຊຶ້ງ ຈະເປັນ “ກ້າວສຳຄັນ” ທີ່ຊ່ວຍຜສານຄວາມຊຳນານດ້ານກາເຟຂອງສະຕາບັກໃຫ້ສອດຄ່ອງກັບຄວາມຕ້ອງການຂອງຕະຫຼາດຈີນ.

ສະຕາບັກວາງແຜນເປີດຕົວເຄື່ອງດື່ມໃໝ່ໆ ແລະແພລດຟອມດິຈິຕອນທັນສະໄໝໃນຈີນ. ຂໍ້ຕົກລົງນີ້ຄາດວ່າຈະແລ້ວສຳເລັດໃນປີໜ້າ ແລະເປັນຂໍ້ຕົກລົງທີ່ໃຫຍ່ທີ່ສຸດໃນຫຼາຍປີທີ່ຜ່ານມາ ທີ່ກ່ຽວຂ້ອງກັບການດຳເນີນງານໃນຈີນຂອງບໍລິສັດຜູ້ບໍລິໂພກລະດັບໂລກ. ເນື່ອງຈາກສະຕາບັກຕ້ອງເຜີຍໜ້າກັບຍອດຂາຍທີ່ຫຼຸດລົງໃນຈີນຫຼາຍປີທີ່ຜ່ານມາ ອັນເນື່ອງມາຈາກການລະບາດຂອງໂຄວິດ-19 ການໃຊ້ຈ່າຍຂອງຜູ້ບໍລິໂພກທີ່ຊະລໍ້າ ແລະການແຂ່ງຂັນຮຸນແຮງຈາກຄູ່ແຂ່ງທ້ອງຖິ່ນ.

ໂດຍສະເພາະ Luckin Coffee ຍີ່ຫໍ້ກາເຟສັນຊາດຈີນ ໄດ້ແຊງສະຕາບັກໃນດ້ານຈຳນວນສາຂາໃນປະເທດຈີນໄປແລ້ວ ແລະດຶງດູດລູກຄ້າດ້ວຍລາຄາທີ່ຖືກກວ່າ ແລະສ່ວນຫຼຸດບ່ອຍໆ ເຮັດໃຫ້ສະຕາບັກຕ້ອງປັບລາຄາລົງເພື່ອແຂ່ງຂັນ ແຕ່ກໍ່ສົ່ງຜົນກະທົບຕໍ່ກຳໄລ. ການປັບໂຄງສ້າງຄັ້ງນີ້ຖືກມອງວ່າເປັນການເຄື່ອນໄຫວເຊິງກະຍຸດ ເພື່ອໃຫ້ສະຕາບັກສາມາດແຂ່ງຂັນໄດ້ໃນລະຍະຍາວ ທ່າມກາງສະພາບແວດລ້ອມທາງທຸລະກິດທີ່ທ້າທາຍໃນຈີນ ເຫມືອນກັບທີ່ຍີ່ຫໍ້ໃຫຍ່ໆ ເຊັ່ນ KFC, Pizza Hut, Gap ແລະ Uber ເຄີຍປະສົບຄວາມຍາກລຳບາກໃນຕະຫຼາດນີ້.

ທີ່ມາ: BBC

ສະແດງຄຳຄິດເຫັນ