ຕາມການໃຫ້ຂໍ້ມູນເບື້ອງຕົ້ນ ຂອງ ສະຫາຍ ຮທ ວິໄລ ໝັ້ນສະຫວ່າງ ຮອງຫົວໜ້າໜ່ວຍງານຄະດີອາຍາ-ເສດຖະກິດ ປກສ ເມືອງສິງ ແຂວງຫຼວງນ້ຳທາ ໃຫ້ຮູ້ວ່າ: ໃນວັນທີ 2 ກໍລະກົດ 2023 ໄດ້ຮັບແຈ້ງຈາກ ປກສ ກຸ່ມບ້ານທົ່ງໃໝ່ ວ່າ: ມີປະຊາຊົນພົບສອງຜົວເມຍແຄນຄໍເສຍຊີວິດ ຢູ່ເຂດບ້ານຫ້ວຍນໍ້າແດງ ເມືອງສິງ.

ດັ່ງນັ້ນ, ຈຶ່ງໄດ້ແຕ່ງຕັ້ງພະນັກງານວິຊາສະເພາະ ລົງສົມທົບກັບ ປກສ ກຸ່ມບ້ານທົ່ງໃໝ່, ອໍານາດການປົກຄອງບ້ານ ກວດກາຊັນນະສູດພິກສາກສົບ ຈຶ່ງຮູ້ວ່າ ຜູ້ເສຍຊີວິດຊື່ ທ້າວ ວັງປ່າວຊົງ ອາຍຸ 33 ປີ ເສຍຊີວິດໃນເວລາປະມານ 17 ໂມງ ຂອງວັນທີ 01 ກໍລະກົດ 2023 ແລະນາງ ເຈ່ຍ ອາຍຸ 34 ປີ ເສຍຊີວິດ ໃນວັນທີ 25 ມີຖຸນາ 2023. ເຊິ່ງທັງສອງເປັນຜົວເມຍກັນ, ມີລູກນຳກັນ 6 ຄົນ, ຍີງ 3 ຄົນ. ກ່ອນໜ້ານັ້ນ ພວກກ່ຽວຢູ່ບ້ານ ລອງຕ້ອງ ເມືອງສົບເບົາ ແຂວງຫົວພັນ. ປະຈຸບັນ ແມ່ນໄດ້ມາເປັນກຳມະກອນຮັບເໝົາປາດຢາງພາລາ ໃຫ້ທ້າວຈັນ ຢູ່ບ້ານ ສີລິເຮືອງ ເມືອງສີງ ແຂວງຫຼວງນ້ຳທາ.

ສະຫາຍ ຮທ ວິໄລ ໝັ້ນສະຫວ່າງ ຍັງໃຫ້ຮູ້ຕື່ມອີກວ່າ: ປະຈຸບັນ ລູກທັງ 6 ຄົນ ແມ່ນໄດ້ພັກເຊົ່າຢູ່ເຮືອນ ທ້າວ ຈັນ ບ້ານ ສີລິເຮືອງ ເພື່ອລໍຖ້າໃຫ້ຍາດພີນ້ອງມາຮັບໄປລ້ຽງ. ສ່ວນສາເຫດ ທາງເຈົ້າໜ້າທີ່ພວມເກັບກຳຂໍ້ມູນ, ເອົາຄຳໃຫ້ການຈາກເຈົ້າຂອງສວນຢາງພາລາ ແລະຍາດພີນ້ອງ.

ທີ່ມາ ຂ່າວ ປກສ ແຂວງຫລວງນ້ຳທາ

ສະແດງຄຳຄິດເຫັນ