ທ່ານ ພັນເອກ ຄໍາສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງຄຳມ່ວນ ລາຍງານຕໍ່ກອງປະຊຸມ ສະຫລຸບການຈັດຕັ້ງປະຕິບັດວຽກງານຕ້ານການຄ້າມະນຸດປະຈຳປີ 2022 ແລະ 6 ເດືອນຕົ້ນປີ 2023, ທິດທາງແຜນການ 6 ເດືອນທ້າຍປີ, ໃນວັນທີ 6 ກໍລະກົດ 2023 ວ່າ: ໃນໄລຍະຜ່ານມາ ຜູ້ຖືກເຄາະຮ້າຍແລະຕົກເປັນເຫຍື່ອຂອງການຄ້າມະນຸດແມ່ນພວກກ່ຽວໄດ້ລັກລອບໄປອອກແຮງງານ ແລ້ວຖືກຕົວະຍົວະຫລອກລວງ ໂດຍການກົດຂີ່ຂູດຮີດແຮງງານຢູ່ບ່ອນອື່ນ ຈິ່ງຖືກສົ່ງກັບມາຊຶ່ງກາຍເປັນ ບັນຫາທີ່ໜ້າເປັນຫວ່ງຫຼາຍ.

ໃນປັດຈຸບັນພວກເຮົາໄດ້ປະເຊີນກັບໄຟເງິນເຟີ້, ສະພາບເສດຖະກິດຕະຫລາດຖີບໂຕເພີ່ມຂຶ້ນສູງ ແລະ ບັນຫາອັນສໍາຄັນໃນແຂວງຄຳມ່ວນກໍາລັງໄດ້ຮັບການພັດທະນາທາງດ້ານເສດຖະກິດຢ່າງກວ້າງຂວາງ ເປັນຕົ້ນເຂດສໍາປະທານບໍ່ເກືອກາລີ ບ້ານດົງໃຕ້, ເມືອງ ທ່າແຂກ ແລະ ໄດ້ຮັບສໍາປະທານໃໝ່ ກໍາລັງເລີ່ມຂຸດຄົ້ນ ຢູ່ທີ່ ບ້ານນາຄໍາ, ເມືອງໜອງບົກ, ເຊິ່ງໃນຂົງເຂດດັ່ງກ່າວໄດ້ມີ ແຮງງານຈາກຕ່າງປະເທດເປັນຕົ້ນຄົນສັນຊາດຈີນ, ໄດ້ເດີນທາງເຂົ້າມາອອກແຮງງານຮັບຈ້າງຫຼາຍພັນຄົນ ນອກຈາກນັ້ນ ກໍໄດ້ມີພົນລະເມືອງລາວ ຈາກຫຼາຍທ້ອງຖິ່ນເຂົ້າປະກອບອາຊີບໃນຫຼາຍສາຂາ ເປັນຕົ້ນການ

ບໍລິການ ເຮືອນພັກ, ຮ້ານກິນດື່ມ, ຮ້ານຄາລາໂອເກະ, ຮ້ານອົບນວດ ແລະ ອື່ນໆ ເຊິ່ງການປະກອບອາຊີບດັ່ງກ່າວ ຈຳນວນນຶ່ງພັດມີການແອບແຝງຂາຍປະເວນີຂອງຍິງສາວທີ່ເປັນພົນລະ ເມືອງລາວໄປນຳ, ຜ່ານການປະຕິບັດງານຂອງເຈົ້າໜ້າທີ່ ກອງບັນຊາການ ປກສ ແຂວງ ໄລຍະຜ່ານມາ ສາມາດມ້າງໄດ້ແລ້ວຈໍານວນ 4 ຮ້ານ ເຊິ່ງມີຜູ້ຖືກຫາ ຈໍານວນ 13 ຄົນ, ຍິງ 12 ຄົນ, ທາງເຈົ້າໜ້າທີ່ຕໍາຫຼວດໄດ້ສະຫລຸບສົ່ງໃຫ້ອົງການໄອຍະການປະຊາຊົນ ແຂວງ ຕາມລະບຽບກົດໝາຍຢ່າງເຂັ້ມງວດ, ນອກຈາກນັ້ນໃນຂົງເຂດດັ່ງກ່າວ ກໍຍັງມີການລັກແຕ່ງງານບໍ່ຖືກຕ້ອງຕາມກົດໝາຍ ແລະ ອາຊະຍາກໍາອື່ນໆ ຊຶ່ງກາຍເປັນບັນຫາຂອງສັງຄົມ ທີ່ຈະຕ້ອງໄດ້ຮີບຮ້ອນແກ້ໄຂໃຫ້ທັນການ.

ທີ່ມາ ລາຍການ ຄວາມສະຫງົບແຂວງຄຳມ່ວນ
ຮູບພາບ: ເປັນພຽງພາບປະກອບເທົ່ານັ້ນ

ສະແດງຄຳຄິດເຫັນ