ສະຫະພາບເອີຣົບ ອະນຸມັດເງິນຊ່ວຍເຫຼືອ ສປປ​ ລາວ​ ມູນຄ່າ 18,40 ລ້ານເອີໂຣ​ ແລະ​ ກຳລັງພິຈາລະນາຊ່ວຍອີກ 4,4​ ລ້ານເອີໂຣສະຫະພາບເອີຣົບ (EU) ໄດ້ອະນຸມັດເງິນຊ່ວຍເຫຼືອລ້າມູນຄ່າ 18,4 ລ້ານເອີໂຣໃຫ້ລັດຖະບານແຫ່ງສປປ ລາວ, ເພື່ອນໍາໃຊ້ເຂົ້າໃນການດຸ່ນງົບປະມານ (Budget Support) ຈາກການຈັດຕັ້ງປະຕິບັດ 2 ແຜນງານຄື: ແຜນງານສະໜັບສະໜູນການຈັດຕັ້ງປະຕິບັດວຽກງານຂະແໜງສຶກສາທີ່ໄດ້ເລີ່ມແຕ່ປີ 2018-2021 ແລະ ແຜນງານສະໜັບສະໜູນວຽກງານໂພຊະນາການເລີ່ມແຕ່ປີ 2019–2022.

ໂດຍຈຸດປະສົງແມ່ນເພື່ອຊຸກຍູ້ການຈັດຕັ້ງປະຕິບັດບັນດານະໂຍບາຍໃນແຜນພັດທະນາຂອງຂະແໜງສຶກສາໃຫ້ສຳເລັດຕາມຄາດໝາຍ, ໂດຍສະເພາະວຽກງານສະໜັບສະໜູນໃຫ້ທຸກຄົນໄດ້ເຂົ້າເຖິງການສຶກສາຢ່າງໜ້ອຍຂັ້ນພື້ນຖານ (ຊັ້ນປະຖົມ ແລະ ມັດທະຍົມ), ການປັບປຸງຄຸນນະພາບຂອງການສຶກສາ ແລະ ການຄຸ້ມຄອງຂອງລັດຖະບານ ໃນຂະແໜງການດັ່ງກ່າວ ແລະ ແຜນງານສະໜັບສະໜູນວຽກງານໂພຊະນາການເລີ່ມແຕ່ປີ 2019–2022 ຈຸດປະສົງແມ່ນເພື່ອເພື່ອສະໜັບສະໜູນການຫຼຸດຜ່ອນການຂາດແຄນອາຫານ, ໂດຍສຸມໃສ່ເພດຍິງ ແລະ ກຸ່ມທີ່ດ້ອຍໂອກາດ.

ເຊິ່ງໃນທ້າຍປີ 2023 EU ຈະພິຈາລະນາການອະນຸມັດເງິນເພື່ອດຸ່ນງົບປະມານງວດສຸດທ້າຍຂອງແຜນງານທີ (2) ຈໍານວນ 4,4 ລ້ານເອີໂຣ. ການນໍາໃຊ້ເງິນເພື່ອດຸ່ນງົບປະມານແມ່ນລັດຖະບານຈະຈັດສັນເຂົ້າໃນບັນດາວຽກງານຂອງຂະແໜງບຸລິມະສິດໂດຍສະເພາະຂະແໜງສຶກສາ ແລະ ສາທາລະນະສຸກ. ການຊ່ວຍເຫຼືອຈາກສະຫະພາບເອີຣົບ ໄດ້ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ–ສັງຄົມຂອງສປປ ລາວ ໂດຍເນັ້ນໃສ່ການພັດທະນາຂະແໜງສັງຄົມ, ເພື່ອສ້າງທຶນມະນຸດໃຫ້ເຂັ້ມແຂງຫຼຸດຜ່ອນຄວາມທຸກຍາກ ແລະ ຊຸກຍູ້ໃຫ້ສປປ ລາວ ຈັດຕັ້ງປະຕິບັດບັນດາເປົ້າໝາຍການພັດທະນາຍືນຍົງ.

ສຳລັບເງິນຈໍານວນດັ່ງກ່າວໄດ້ຖືກໂອນເຂົ້າບັນຊີຄັງເງິນແຫ່ງຊາດໃນຄັ້ງວັນທີ 04 ສິງຫາ 2023. ເຊິ່ງກ່ອນໜ້ານີ້, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ແລະ ທ່ານ ນາງ ອີນາ ມາຈລໍນີແຕ ເອກະອັກຄະລັດຖະທູດ EU ປະຈຳສປປ ລາວ, ໄດ້ມີການພົບປະສອງຝ່າຍ, ໄດ້ແລກປ່ຽນຄວາມຄິດເຫັນໃນການຈັດຕັ້ງປະຕິບັດ ແລະ ການຮ່ວມມືອັນຍາວນານລະຫວ່າງລັດຖບານແຫ່ງ​ ສປປ ລາວ ແລະ EU ຜ່ານການສະໜັບສະໜູນເງິນດຸ່ນດ່ຽງມະຫາພາກໃຫ້ລັດຖະບານ ແລະ ການສະໜັບສະໜູນຊ່ວຍເຫຼືອດ້ານວິຊາການກ່ຽວກັບຄຸ້ມຄອງລາຍຈ່າຍການເງິນພາກລັດ, ຮັບປະກັນໃຫ້ການໃຊ້ຈ່າຍຂອງລັດຖະບານມີປະສິດທິຜົນສູງກວ່າເກົ່າ.

ຂ່າວ: ກະຊວງ​ການ​ເງິນ

ສະແດງຄຳຄິດເຫັນ