ຈີນ ຫຼັງ​ຈາກ​ທີ່​ມີ​ການ​ເຕີບ​ໂຕ​ຢ່າງວ່ອງ​ໄວ​ຫຼາຍ​ປີ, ພວມ​ກ້າວ​ໄປ​ສູ່​ການ​ພັດ​ທະ​ນາເສດ​ຖະ​ກິດ​ ທີ່​ມີ​ຄຸນ​ນະ​ພາບ​ສູງ ແລະ ການ​ຍົກ​ລະ​ດັບ​ອຸດ​ສາ​ຫະ​ກຳ​ໃຫ້​ທັນ​ສະ​ໄໝ​ດີກວ່າ​ເກົ່າ. ຄົນ​ທັງ​ຫຼາຍ​ໄດ້​ຮັບ​ຮູ້​ເຖິງ​ໂອ​ກາດ​ຂອງ​ຈີນ ທີ່​ມີ​ຕໍ່​ການ​ພັດ​ທະ​ນາເສດ​ຖະ​ກິດ​​ໂລກ.

ເປົ້າໝາຍ​ການ​ເຕີບ​ໂຕ​ດ້ານ ​ລວມຍອດ​ຜະ​ລິດ​ຕະ​ພັນພາຍ​ໃນ ຫຼື GDP ຂອງ​ຈີນ​ໃນ​ປີ 2024 ໃຫ້​ຢູ່​ໃນ​ລະ​ດັບ​ປະ​ມານ 5% ໄດ້​ຖືກ​ເປີດ​ເຜີຍໃນ​ກອງປະ​ຊຸມ​ສະ​ພາ​ປະ​ຊາ​ຊົນ​ແຫ່ງ​ຊາດ​ຈີນ ແລະ ສະ​ພາ​ເປິກ​ສາ​ການ​ເມືອງ​ປະ​ຊາ​ຊົນ​ແຫ່ງ​ຊາດ​ຈີນ ຫຼື ເອີ້ນ​ວ່າ ກອງ​ປະ​ຊຸມ​ສອງ​ສະ​ພາ, ທີ່​ຈັດ​ຂຶ້ນ​ຢູ່​ນະ​ຄອນ​ຫຼວງ​ປັກ​ກິ່ງ ແຕ່​ວັນ​ທີ 4 ຫາ 11 ເດືອນ​ມີ​ນານີ້.   ​

ໃນກອງປະຊຸມສອງສະພາປີນີ້, ເນື້ອໃນບົດລາຍງານວຽກງານຂອງລັດຖະບານຈີນລະບຸວ່າ, ເປົ້າໝາຍຕົ້ນຕໍດ້ານການພັດທະນາຂອງຈີນໃນປີນີ້ ຄື GDP ​ໃຫ້​ຢູ່​ໃນ​ລະ​ດັບປະມານ 5%; ຈຳນວນຜູ້ປະກອບອາຊີບໃນຕົວເມືອງເພີ່ມຂຶ້ນຫຼາຍກວ່າ 12 ລ້ານຄົນ, ອັດຕາຫວ່າງງານຕາມການສຳຫຼວດໃນຕົວເມືອງຢູ່ໃນປະມານ 5,5%; ລາຄາສິນຄ້າບໍລິໂພກຂອງພົນລະເມືອງເພີ່ມຂຶ້ນປະມານ 3%; ຈັງຫວະການເຕີບໂຕດ້ານລາຍຮັບຂອງພົນລະເມືອງໃຫ້ໄປຄວບຄູ່ກັບການເຕີບໂຕດ້ານເສດຖະກິດ; ລາຍຮັບລາຍຈາຍສາກົນຮັກສາຄວາມດຸ່ນດ່ຽງໂດຍພື້ນຖານ; ປະລິມານຜົນຜະລິດສະບຽງອາຫານມີຫຼາຍກວ່າ 650 ລ້ານໂຕນ ແລະ ຄຸນນະພາບຂອງສິ່ງແວດລ້ອມນິເວດໄດ້ຮັບການປັບປຸງດີຂຶ້ນຢ່າງຕໍ່ເນື່ອງ.

ໃນປີ 2023 ​ຜ່ານ​ມາ, ເສດຖະກິດຈີນໄດ້ຟື້ນຕົວດີຂຶ້ນໂດຍລວມ, GDP ຂອງຈີນ ມີຫຼາຍກວ່າ 126.000 ຕື້ຢວນ, ເພີ່ມຂຶ້ນ 5,2%, ຈັງຫວະການເຕີບໂຕໄດ້ຢືນຢູ່ແຖວໜ້າໃນບັນດາກຸ່ມເສດຖະກິດຕົ້ນຕໍຂອງໂລກ, ໄດ້ສ້າງວຽກເຮັດງານທຳໃນຕົວເມືອງ 12,44 ລ້ານຕຳແໜ່ງ, ອັດຕາວ່າງງານຕາມການສຳຫຼວດໃນຕົວເມືອງສະເລ່ຍແລ້ວຢູ່ໃນລະດັບ 5,2%. ລາຄາບໍລິໂພກຂອງພົນລະເມືອງເພີ່ມຂຶ້ນ 0,2%, ລາຍຮັບ-ລາຍຈ່າຍສາກົນໄດ້ຮັກສາຄວາມດຸນດ່ຽງກັນໂດຍພື້ນຖານ.

ໃນຫຼາຍປີມໍ່ໆມານີ້, ເມື່ອສັງເກດຈາກທົ່ວໂລກແລ້ວເຫັນວ່າ, ຈັງຫວະການເຕີບໂຕເສດຖະກິດຂອງປະເທດທີ່ພັດທະນາແລ້ວສ່ວນຫຼາຍຢູ່ລະຫວ່າງ 2% ຫາ 3%. ຈີນໄດ້ຕັ້ງເປົ້າໝາຍໃຫ້ຢູ່ໃນລະດັບປະມານ 5%, ໄດ້ເປັນການສົ່ງສັນຍານທີ່ຕັ້ງໜ້າໃຫ້ແກ່ໂລກ ແລະ ສ່ອງແສງໃຫ້ເຫັນເຖິງຄວາມຕັດສິນໃຈ ແລະ ຄວາມພະຍາຍາມຂອງຈີນ ເພື່ອຊ່ວຍຊຸກຍູ້ການຟື້ນຕົວຂອງເສດຖະກິດໂລກ.

ເປົ້າໝາຍໄດ້ກຳນົດໄວ້ແລ້ວ, ຈະປະຕິບັດແນວໃດ? ລັດຖະບານຈີນໄດ້ວາງວຽກງານຕົ້ນຕໍ 10 ລາຍການໃນປີນີ້, ລວມທັງສຸມໃສ່ຊຸກຍູ້ການສ້າງລະບົບອຸດສາຫະກຳທັນສະໄໝ, ລົງເລິກຈັດຕັ້ງປະຕິບັດຍຸດທະສາດການສ້າງປະເທດໃຫ້ຈະເລີນຮຸ່ງເຮືອງດ້ວຍວິທະຍາສາດ ແລະ ການສຶກສາ, ສຸມໃສ່ເປີດກວ້າງຄວາມຕ້ອງການຂອງພາຍໃນປະເທດ ແລະ ເປີດກວ້າງປະຕູສູ່ພາຍນອກຢ່າງມີລະດັບສູງເປັນຕົ້ນ. ປັດ​ຈຸ​ບັນ ຍານ​ພາ​ຫະ​ນະ​ພະ​ລັງ​ງານໃໝ່ ທີ່​ຜະ​ລິດ​ຈາກ​ຈີນ​ແມ່ນ​ກຳ​ລັງ​ໄດ້​ຮັບ​ຄວາມ​ນິ​ຍົມຫຼາຍໃນ​ໂລກ.

ບົດລາຍງານວຽກຂອງລັດຖະບານຍັງ​ໄດ້ເນັ້ນໃສ່ການ “ສຸມໃສ່ເປີດກວ້າງຄວາມຕ້ອງການຂອງພາຍໃນປະເທດ”, ການບໍລິໂພກແບບໃໝ່ໃຫ້ເຕີບໃຫຍ່ຂະຫຍາຍຕົວ, ຫຼືວ່າແມ່ນຮັກສາ ແລະ ເປີດກວ້າງການບໍລິໂພກແບບດັ້ງເດີມ, ຕະຫຼາດຂະໜາດໃຫຍ່ພິເສດທີ່ມີປະຊາກອນ 1,4 ຕື້ຄົນ ເປັນໂອກາດທີ່ບໍ່ຄວນ​ພາດ ສຳລັບທົ່ວໂລກ. ການເປີດກວ້າງປະຕູສູ່ພາຍນອກຂອງ​ຈີນຢ່າງບໍ່ຢຸດຢັ້ງ ໄດ້ເພີ່ມຄວາມແນ່ນອນທີ່ລ້ຳຄ່າໃຫ້ແກ່ໂລກ.

ບັນດາຜູ້ສັງເກດການໄດ້ກ່າວວ່າ ການເຕີບໂຕຂອງ GDP ໃຫ້ຢູ່​ໃນ​ລະ​ດັບ 5% ໃນ​ປີ 2024 ແມ່ນສອດຄ່ອງກັບເປົ້າຫມາຍ ການພັດທະນາໄລຍະຍາວທີ່ວາງອອກ ໃນ​ແຜນ​ພັດ​ທະ​ນາເສດ​ຖະ​ກິດ-ສັງ​ຄົມ 5ປີ ຄັ້ງທີ 14 ແລະ ເປົ້າ​    ໝາຍໄຍລຍະຍາວເຖິງປີ 2035, ເຊິ່ງລະບຸວ່າ GDP ຂອງປະເທດຄວນ ເພີ່ມ​ຂຶ້ນເປັນສອງເທົ່າພາຍໃນປີ 2035, ເມື່ອທຽບໃສ່ລະດັບປີ 2020.

​ຈີນ​ແມ່ນ​ປະ​ເທດ​ເສດ​ຖະ​ກິດ ທີ່​ໃຫຍ່​ເປັນ​ອັນ​ດັບ​ສອງ​ຂອງ​ໂລກ ແລ​ະ ການ​ພັ​ດ​ທະ​ນາ​ເສດ​ຖະ​ກິດ​ຂອງຈີນ ໄດ້​ສ້າງ​ຜົນ​ປະ​ໂຫຍດ​ໃຫ້​ແກ່​ປະ​ເທດ​ຕ່າງໆໃນ​ໂລກ ໃນປີ 2023. ຈີນ​ໄດ້​ຕັ້ງ​ເປົ້າ​ໝາຍ​ການ​ເຕີບ​ໂຕ​ເປັນ​ປະ​ມານ 5% ແລະ ໄດ້​ວາງມາດ​ຕະ​ການ​ລະ​ອຽດ 10 ລາຍ​ການ​ອອກ​ມາ ຈະ​ເປັນ​ພະ​ລັງ​ຂັບ​ເຄື່ອນ​ໃຫ້​ແກ່​ເສດ​ຖະ​ກິດ​ໂລກ. ໂດຍ​ສະ​ເພາະ ປະ​ເທດ​ທີ່​ຢູ່​ອ້ອມ​ຂ້າງ​ປະ​ເທດລາວ ກໍ​ຈະ​ໄດ້​ຮັບ​ຜົນ​ປະ​ໂຫຍດ​ໃນ​ການ​ຮ່ວມ​ມື​ກັບ​ຈີນ.

ພາບ: ວິ​ທະ​ຍຸ ແລະ ໂທ​ລະ​ພາຍ​ສູນ​ກາງ​ຈີນ

ສະແດງຄຳຄິດເຫັນ