ຈີນພັດທະນາແຫຼ່ງພະລັງງານສະອາດ ແລະ ພະລັງງານທົດແທນໃນລາວ ພ້ອມທັງສົ່ງໄປຕ່າງປະເທດຢ່າງຫຼາກຫຼາຍ
ລາວເປັນປະເທດທີ່ມີຊັບພະຍາກອນນ້ຳ ແລະ ພູຜ່າປ່າໄມ້ທີ່ອຸດົມສົມບູນແຫ່ງໜຶ່ງ ໃນພາກພື້ນອາຊີຕາເວັນອອກສຽງໃຕ້ ເຊິ່ງຄວາມຫຼາກຫຼາຍທາງຊັບພະຍາກອນເຫຼົ່ານີ້ ໄດ້ກາຍເປັນທ່າແຮງອັນສຳຄັນໃຫ້ແກ່ການພັດທະນາແຫຼ່ງພະລັງງານສະອາດ ແລະ ພະລັງງານທົດແທນ ເພື່ອສະໜອງໄຟຟ້າຢູ່ພາຍໃນປະເທດ ແລະ ສົ່ງອອກໄປຕ່າງປະເທດ. ປັດຈຸບັນ, ພະລັງງານໝູນວຽນແບບນີ້ ແມ່ນໄດ້ຮັບຄວາມເອົາໃຈໃສ່ນັບມື້ນັບສູງຂຶ້ນໃນທົ່ວໂລກ ກໍຄືລັດຖະບານລາວໄດ້ສົ່ງເສີມການລົງທືນໃນຮູບແບບອື່ນໆຂອງພະລັງງານສີຂຽວ ເພື່ອສົ່ງຂາຍໄປຍັງບັນດາປະເທດທີ່ມີຊາຍແດນຕິດຈອດຢ່າງຕໍ່ເນື່ອງ.
ຈີນແມ່ນປະເທດໜຶ່ງທີ່ມີການມາລົງທຶນເຂົ້າໃນການພັດທະນາດ້ານພະລັງສະອາດຢູ່ລາວຢ່າງຫຼວງຫຼາຍ ທັງເປັນປະເທດແຫຼ່ງທຶນໃຫຍ່ທີ່ສຸດ ແລະ ຄູ່ການຄ້າໃຫຍ່ອັນດັບ 2 ຂອງລາວ, ແມ່ນຜູ້ເຂົ້າຮ່ວມ ແລະ ຜູ້ຊຸກຍູ້ຕົ້ນຕໍໃນການກໍ່ສ້າງເຂື່ອນໄຟຟ້າພະລັງງານນ້ຳຢູ່ປະເທດລາວ. ອີງຕາມບົດວິເຄາະສະຖານະການ ຈາກພະແນກພາກພາສາລາວຂອງວິທະຍຸ ແລະ ໂທລະພາບສູນກາງຈີນ ໃນຫວ່າງມໍ່ໆມານີ້ໃຫ້ຮູ້ວ່າ: ວິສາຫະກິດຈີນໄດ້ລົງທຶນສ້າງເຂື່ອນໄຟຟ້າຢູ່ລາວໄປແລ້ວ 18 ແຫ່ງ ເຊັ່ນ: ເຂື່ອນໄຟຟ້າພະລັງງານນ້ຳຕາມລຳແມ່ນ້ຳອູ, ເຂື່ອນໄຟຟ້ານ້ຳລີກ 1-2 ແລະ ເຂື່ອນໄຟຟ້ານ້ຳງຽບ 2 ເປັນຕົ້ນ, ກຳລັງການຕິດຕັ້ງເຄື່ອງຈັກຜະລິດໄຟຟ້າມີເຖິງ 2.348 ເມກາວັດ ເຊິ່ງໄດ້ຊຸກຍູ້ການພັດທະນາ ໃນດ້ານຂະແໜງພະລັງງານໄຟຟ້າຂອງລາວຢ່າງຕໍ່ເນື່ອງ. ໂຄງການເຫຼົ່ານີ້ ບໍ່ພຽງແຕ່ໄດ້ສະໜອງພະລັງງານສະອາດຢ່າງໝັ້ນທ່ຽງໃຫ້ແກ່ລາວເທົ່ານັ້ນ ຍັງໄດ້ສ້າງວຽກເຮັດງານທໍາໃຫ້ແກ່ປະຊາຊົນທ້ອງຖິ່ນ ພ້ອມທັງໄດ້ສ້າງ ແລະ ບູລະນະເສັ້ນທາງ, ຂົວ, ໂຮງຮຽນ, ສວນສະໜຸກ ແລະ ພື້ນຖານໂຄງລ່າງອື່ນໆ ໃຫ້ແກ່ທ້ອງຖິ່ນຕ່າງໆຂອງລາວ ເຊິ່ງເປັນການຊຸກຍູ້ພັດທະນາເສດຖະກິດສັງຄົມຂອງທ້ອງຖິ່ນເຫຼົ່ານັ້ນເປັນຢ່າງດີ.
ນອກຈາກນີ້ແລ້ວ, ໂຄງການຜະລິດໄຟຟ້າດ້ວຍພະລັງງານລົມທີ່ໃຫຍ່ທີ່ສຸດໃນພາກພື້ນອາຊີຕາເວັນອອກສຽງໃຕ້ ທັງແມ່ນໂຄງການຜະລິດໄຟຟ້າດ້ວຍພະລັງງານລົມແຫ່ງທຳອິດໃນລາວ ທີ່ນຳເອົາໂອກາດການພັດທະນາສີຂຽວໃຫ້ແກ່ປະເທດຕື່ມອີກ. ໂຄງການດັ່ງກ່າວນີ້ແມ່ນຕັ້ງຢູ່ແຂວງເຊກອງ ແລະ ແຂວງອັດຕາປື ທາງພາກໃຕ້ຂອງລາວ ໂດຍວິສາຫະກິດຈີນເປັນຜູ້ຮັບເໝົາກໍ່ສ້າງ. ພາຍຫຼັງໂຄງການສ້າງສຳເລັດແລ້ວ, ຕົ້ນຕໍຈະສົ່ງພະລັງງານໄຟຟ້າໄປສູ່ຫວຽດນາມ.
ນອກນີ້, ຈີນ-ລາວ ຍັງໄດ້ສ້າງໂຄງການຜະລິດໄຟຟ້າດ້ວຍພະລັງງານແສງຕາເວັນໄລຍະ 1 ທີ່ຕັ້ງຢູ່ແຂວງອຸດົມໄຊ ທາງພາກເໜືອລາວ ເຊິ່ງໂຄງການກຳລັງເຂົ້າສູ່ໄລຍະກະກຽມ. ພາຍຫຼັງໂຄງການສ້າງສຳເລັດແລ້ວ ຈະກາຍເປັນໂຄງການຜະລິດໄຟຟ້າດ້ວຍແສງຕາເວັນທີ່ໃຫຍ່ທີ່ສຸດໃນປະເທດລາວ, ສາມາດຜະລິດໄຟຟ້າໄດ້ປະມານ 1,7 ຕື້ກິໂລວັດໂມງ ເຊິ່ງຈະສາມາດຊ່ວຍຫຼຸດການລະບາຍກາກບອນເຖິງ 1,41 ລ້ານໂຕນໃຫ້ແກ່ໂລກ, ສະໜອງໄຟຟ້າໃຫ້ແກ່ປະຊາຊົນອາຊີ ໄດ້ປະມານ 3 ລ້ານຄອບຄົວ ແລະ ການພັດທະນາເສດຖະກິດສັງຄົມຂອງທ້ອງຖິ່ນ.
ມາຮອດເດືອນພຶດສະພາ ປີ 2023, ທົ່ວປະເທດລາວມີໂຮງງານຜະລິດໄຟຟ້າທີ່ມີກຳລັງຕິດຕັ້ງລວມກັນຫຼາຍກວ່າ 11.661 ເມກາວັດ ເຊິ່ງສາມາດຜະລິດກະແສໄຟຟ້າໄດ້ຫຼາຍກວ່າ 58.813 ກິໂລວັດໂມງຕໍ່ປີ. ບັນດາໂຮງງານເຫຼົ່ານີ້ປະກອບມີ ເຂື່ອນໄຟຟ້າພະລັງງານນ້ຳ 81 ແຫ່ງ, ໂຮງງານພະລັງງານໄຟຟ້າທົດແທນ 12 ແຫ່ງ ລວມທັງພະລັງງານໄຟຟ້າແສງຕາເວັນ ແລະ ໂຮງງານຜະລິດໄຟຟ້າຖ່ານຫີນ. ການສຸມໃສ່ການສ້າງພະລັງງານສະອາດ ແລະ ພະລັງງານທົດແທນ ໄດ້ບັນລຸການສະໜອງໄຟຟ້າໃຫ້ເທດສະບານແຂວງ 100%, ບ້ານ 94% ແລະ ຄອບຄົວຕ່າງໆ 95% ພ້ອມທັງໄດ້ສົ່ງອອກພະລັງງານໄຟຟ້າຢ່າງຫຼາກຫຼາຍໃຫ້ແກ່ຈີນ, ໄທ, ຫວຽດນາມ ແລະ ກຳປູເຈຍ ເຊິ່ງໄດ້ສ້າງລາຍຮັບທີ່ເປັນເງິນຕາຕ່າງປະເທດໃຫ້ແກ່ລາວເປັນຈຳນວນຫຼວງຫຼາຍ.
ທີ່ມາ VientianeTimes
