ເກີດເຫດໄປລ່າສັດແຕ່ຍິງຖືກກັນເສຍຊີວິດ ຢູ່ເຂດບ້ານກໍເພັນ ເຂດກຸ່ມຊຽງແຂງ ເມືອງສິງ
ປກສ ເມືອງສິງ ແຂວງ ຫຼວງນ້ຳທາ ໃຫ້ຮູ້ວ່າ: ໃນຄັ້ງວັນທີ 3 ມີນາ 2023 ມີເຫດການຍິງຖືກກັນເສຍຊິວິດ ຢູ່ຟາມງົວ ຢູ່ເຂດບ້ານກໍເພັນ ເຂດກຸ່ມຊຽງແຂງ ເມືອງສິງ ພາຍຫຼັງທີ່ເຈົ້າໜ້າທີ່ໄດ້ຮັບແຈ້ງກໍລົງກວດກາສະຖານທີ່ເກີດເຫດຕົວຈິງ ຈຶ່ງພົບຜູ້ເສຍຊີວິດ 1 ຄົນ ຊື່ທ້າວ ປໍຍໍ ອາຍຸ 45 ປີ ອາຊີບ ກຳມະກອນ ພົບເຫັນມີຮ່ອງຮ່ອຍລູກໂດດ ຖືກຍິງທີ່ກະໂຫຼກຫົວທາງຫຼັງ ຈຳນວນ 3 ລູກເຂົ້າ
ບ່ອນດຽວກັນ ມີຄວາມຍາວ 2,5 ຊັງຕິແມັດ ກ້ວາງ 1,2 ຊັງຕີແມັດ ມີຮ່ອງຮອຍຈຸດລູກປືນສອດອອກໜ້າຜາກ 1 ຈຸດໃຫຍ່ ມີຄວາມຍາວ 3 ຊັງຕີແມັດ ກ້ວາງ 2 ຊັງຕີແມັດ ພ້ອມທັງກັກຕົວຜູ່ກໍ່ເຫດໄດ້ 1 ຄົນ ຊື່ທ້າວ ອາກອງ ອາຍຸ 19 ປີ ອາຊີບ ກຳມະກອນ ທັງ 2 ຄົນ ແມ່ນຢູ່ ບ້ານອ້າຍຢາງ ເມືອງລອງ ແຂວງຫຼວງນ້ຳທາ.
ຈາກເຫດການດັ່ງກ່າວ ທ້າວ ອາກອງ ໄດ້ໃຫ້ການຕໍ່ເຈົ້າໜ້າທີວ່າ: ໃນຄັ້ງວັນທີ 2 ມີນາ 2023 ເວລາປະມານ 12 ໂມງ ທ້າວ ປໍຍໍ (ຜູ້ເສຍຊິວິດ) ເຊິ່ງເປັນພີ່ນ້ອງກັນ ທີ່ໄດ້ຮັບຈ້າງລ້ຽງງົວໃຫ້ກັບຄົນ ບ້ານເອີຫຼ້າໃໝ່ ໄດ້ໂທມາຫາແມ່ຂອງຕົນວ່າ ປັດຈຸບັນ ໄດ້ຈັບຄວາຍໄວ້ຢູ່ຄອກຈຳນວນໜຶ່ງ ຖ້າຜູ້ໃດທັນແມ່ນໃຫ້ພາກັນມາເບິ່ງ ເຊິ່ງອາດແມ່ນຄວາຍ ຈຳນວນທີ່ຊອກບໍເຫັນນັ້ນ ຈາກນັ້ນຜູ້ກ່ຽວກໍໄດ້
ກິນເຂົ້າທ່ຽງແລ້ວ ກະກຽມເອົາເຄື່ອງໃຊ້ທີ່ຈຳເປັນ ແລະ ປືນແກບ 1 ກະບອກ ຍ່າງອອກໄປຫາຟາມງົວທີ່ ທ້າວ ປໍຍໍ (ຜູ້ເສຍຊິວິດ) ຢູ່ ເຊິ່ງໃຊ້ເວລາຍ່າງໄປ 1 ຊົ່ວໂມງ ໃນເມື່ອໄປຮອດແລ້ວທັງ 2 ຄົນ ໄດ້ພາກັນໄປເບິ່ງຄວາຍ ເຊິ່ງແມ່ນຄວາຍຂອງຜູ້ກ່ຽວ 4 ໂຕ ແຕ່ຍັງບໍທັນຄົບ ຈາກນັ້ນທັງສອງກໍໄດ້ລົມກັນ ວ່າມື້ນີ້ແມ່ນມືດແລ້ວ ພາກັນພັກຜ່ອນກ່ອນ ມື້ອື່ນຕອນເຊົ້າແລ້ວຄ່ອຍໄປຊອກຕື່ມ.
ພໍຕົກມາຮອດຕອນເຊົ້າຂອງວັນທີ 3 ມີນາ 2023 ເວລາປະມານ 10 ໂມງ ທັງ 2 ຕົນຈຶ່ງໄດ້ພາກັນກະກຽມເຄື່ອງໃຊ້ທີ່ຈຳເປັນ ພ້ອມກັບປືນແກບ ຄົນລະ 1 ກະບອກ ແລ້ວອອກໄປຊອກຫາຄວາຍ ພໍຮອດເວລາປະມານ 14 ໂມງ ພວກກ່ຽວແມ່ນໄດ້ຍິນສຽງໄກ່ປ່າເຂ່ຍໃບໄມ້ ຢູ່ບໍລິເວນຂອບເຂດນັ້ນ ທັງສອງຈຶ່ງໄດ້ພາກັນກະກຽມຫ້າງປື້ນຈອບຍິງ ຕົນແມ່ນໄດ້ຢູ່ທາງຫຼັງ ຂອງຜູ້ເສຍຊິວິດ ຢືນຫ່າງກັນ
ໃນໄລຍະປະມານ 2 ແມັດ ພ້ອມທັງຫັນປາຍປືນໄປຫາທາງສຽງສັດ ໃນເວລານັ້ນຜູ້ເສຍຊິວິດໄດ້ຢູ່ທ່ານັ້ງ ແລ້ວໄດ້ເກາະໄກປືນຍິງໃສ່ໂຕຟານ 1 ບາດ ແລ້ວເຫັນໂຕຟານແລ່ນລົງມາທາງໜ້າຂອງພວກກ່ຽວ ຕົນຈຶ່ງໄດ້ເກາະໄກປືນຍິງໂຕຟານເພື່ອຍິງຊ້ຳໃຫ້ມັນຕາຍ ເວລາເກາະປືນນັ້ນ ຜູ້ເສຍຊິວິດໄດ້ຢືນຂຶ້ນກະທັນຫັນ ເຮັດໃຫ້ລູກປືນຂອງຕົນຖືກໃສ່ບໍລິເວນຫົວ ຂອງຜູ້ເສຍຊີວິດ ແລ້ວເຮັດໃຫ້ຜູ້ເສຍຊິວິດ
ລົ້ມລົງກັບພື້ນ ກິ້ງລົງພູໄປປະມານ 1 ແມັດ ແລ້ວຕົນຈຶ່ງໄດ້ຟ້າວລົງໄປ ອຸ້ມເອົາຮ່າງຂອງຜູ້ເສຍຊິວິດ ແຕ່ສັງເກດເຫັນວ່າມີເລືອດໄຫຼອອກຈາກຫົວເປັນຈຳນວນຫຼາຍ ຄາດວ່າບໍ່ມີໂອກາດລອດແລ້ວ ຕົນຈຶ່ງໄດ້ແລ່ນ ກັບໄປຟາມງົວ ແລ້ວບອກໃຫ້ຄອບຄົວຜູ້ເສຍຊິວິດ ແລະ ປະຊາຊົນ ບ້ານກໍເພນ ມາຊ່ວຍນຳເອົາຮ່າງ ຜູ້ເສຍຊິວິດ ກັບໄປຟາມງົວ.
ປັດຈຸບັນ ທາງເຈົ້າໜ້າທີ່ສືບສວນ-ສອບສວນຄະດີອາຍາ ປກສ ເມືອງສິງ ໄດ້ສົ່ງຜູ້ກ່ຽວໃຫ້ທາງ ກອງບັນຊາການ ປກສ ແຂວງ ສືບຕໍ່ດຳເນີນຄະດີຕາມລະບຽບກົດໝາຍ.
ທີ່ມາ ສະຖານີວິທະຍຸກະຈາຍສຽງ ເມືອງສິງ ແຂວງຫຼວງນໍ້າທາ
