ວັນທີ 16 ພຶດສະພາ 2023, ເຈົ້າໜ້າທີ່ພາສີ ປະຈຳດ່ານພາສີສາກົນບໍ່ເຕັນ ແຂວງຫລວງນໍ້າທາ, ເຈົ້າໜ້າທີ່ພາສີກຸ່ມວຽກຄຸ້ມຄອງພາຫະນະ ຈຸດປະຈຳໄມ້ກັ້ນ, ໄດ້ເຂັ້ມງວດກວດກາໃນການຈັດຕັ້ງປະຕິບັດໜ້າທີ່ວິຊາສະເພາະໃນການຕ້ານ ແລະ ສະກັ້ນການການລັກລອບລົດນໍາເຂົ້າບໍ່ຖືກຕ້ອງຕາມລະບຽບກົດໝາຍ, ຊຶ່ງສາມາດຢຶດລົດເກັງ ຍີ່ຫໍ້ KIA K5 ໄດ້ຈໍ 2 ຄັນ ທີ່ໃສ່ປ້າຍທະບຽນປອມ.

ໂດຍຜ່ານການກວດກາເບື້ອງຕົ້ນເຫັນວ່າ: ລົດເກັງ 2 ຄັນ ຍີ່ຫໍ້ KIA K5 ທີ່ລັກລອບນຳເຂົ້າບໍ່ຖືກຕ້ອງຕາມລະບຽບກົດໝາຍ ແລະ ໄດ້ໃສ່ປ້າຍທະບຽນປອມທັງ 2 ຄັນ, ທະບຽນ (ຫລວງນໍ້າທາ ກສ 4789, ກໍາແພງນະຄອນ ຮຈ 9399) ຊຶ່ງບໍ່ມີເອກະສານຖືກຕ້ອງ ແລະ ບໍ່ມີເອກະສານຢັ້ງຢືນຂອງການມອບພັນທະອື່ນໆ.

ດັ່ງນັ້ນ, ເຈົ້າໜ້າທີ່ພາສີປະຈໍາດ່ານພາສີສາກົນບໍ່ເຕັນ, ຈຶ່ງໄດ້ເຮັດບົດບັນທຶກຄະດີມອບ-ຮັບລົດຈໍານວນ 2 ຄັນດັ່ງກ່າວໃຫ້ພາສີ ປະຈຳແຂວງຫລວງນໍ້າທາ ດຳເນີນຂັ້ນຕອນຕາມກົດໝາຍ ແລະ ລະບຽບການຕໍ່ໄປ.

ສະແດງຄຳຄິດເຫັນ