ລັດຖະບານອົດສະຕຣາລີ ໄດ້ໃຫ້ການສະໜັບສະໜູນເຄື່ອງຟອກໝາກໄຂ່ຫລັງ ຈຳນວນ 5 ໜ່ວຍ ລວມມູນຄ່າ 1,2 ຕື້ກວ່າກີບ ໃຫ້ສຳລັບໂຮງໝໍແຂວງບໍ່ແກ້ວ, ໄຊຍະບູລີ, ບໍລິຄຳໄຊ ແລະ ເຊກອງ ໃນວັນທີ 31 ພຶດສະພາ 2023, ເພື່ອຊ່ວຍເຫລືອຊີວິດຄົນເຈັບຫລາຍພັນຄົນ ແລະ ຮັບປະກັນຄຸນນະພາບຊີວິດທີ່ດີຂຶ້ນ.

ການຊ່ວຍເຫລືອດັ່ງກ່າວໂດຍມີທ່ານ ນາງ ວາແນັດຊ້າ ເຮກາຕີ້ ເລຂາເອກ ສະຖານທູດອົດສະຕຣາລີ ແລະ ທ່ານ ດຣ ນາງ ຍິງ-ຣູ ແຈັກກະລິນ ໂລ ຜູ້ຕາງໜ້າອົງການອະນາໄມໂລກ ມອບເຄື່ອງຟອກໝາກໄຂ່ຫລັງ ໃຫ້ແກ່ ທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ.

ເຄື່ອງຟອກໝາກໄຂ່ຫລັງ ຈັດຊື້ໂດຍອົງການອະນາໄມໂລກ ຈະຊ່ວຍໃຫ້ຜູ້ທີ່ເປັນພະຍາດໝາກໄຂ່ຫລັງສາມາດເຂົ້າເຖິງການປິ່ນປົວໄດ້ດີຂຶ້ນ ໂດຍຄາດວ່າຈະສາມາດຊ່ວຍເຫລືອຄົນເຈັບໄດ້ຕື່ມອີກຫລາຍກວ່າ 5.000 ຄົນ ຕໍ່ປີ. ນອກນີ້, ຍັງຈະເຮັດໃຫ້ຄົນເຈັບທີ່ຕິດເຊື້ອພະຍາດໂຄວິດ-19 ສາມາດໄດ້ຮັບການປິ່ນປົວແຍກຕ່າງຫາກ ເພື່ອຫລຸດຜ່ອນຄວາມສ່ຽງໃນການແຜ່ລາມຂອງເຊື້ອໄວຣັສດັ່ງກ່າວໄປສູ່ຄົນເຈັບຜູ້ອື່ນໆ.

ນອກຈາກເຄື່ອງຟອກໝາກໄຂ່ຫລັງ, ລັດຖະບານອົດສະຕຣາລີ ຍັງໄດ້ຊ່ວຍເຫລືອເຄື່ອງກວດພະຍາດໂຄວິດ-19 ແບບໄວ ຈຳນວນ 68.000 ຊຸດ ແລະ ຢາປິ່ນປົວທີ່ຈຳເປັນໃນການປິ່ນປົວພະຍາດໂຄວິດ-19 ເຊິ່ງໄດ້ແຈກຢາຍໃຫ້ບັນດາໂຮງໝໍສູນກາງ. ການຊ່ວຍເຫລືອຄັ້ງນີ້ ແມ່ນເປັນການຊ່ວຍເຫລືອເພີ່ມເຕີມຕໍ່ຈາກການຊ່ວຍເຫລືອເຄື່ອງຟອກໝາກໄຂ່ຫລັງ 4 ໜ່ວຍ ຈາກລັດຖະບານອົດສະຕຣາລີ ທີ່ໄດ້ມອບໃຫ້ແກ່ແຂວງຄໍາມ່ວນ, ສາລະວັນ ແລະ ຈໍາປາສັກ ໃນທ້າຍປີທີ່ຜ່ານມາ.

ໂອກາດນີ້, ທ່ານ ລັດຖະມົນຕີ ກະຊວງສາທາລະນະສຸກ ກ່າວວ່າ: “ການສ້າງລະບົບສາທາລະນະສຸກທີ່ເຂັ້ມແຂງ ໝາຍເຖິງການປັບປຸງການບໍລິການໃຫ້ດີຂຶ້ນ, ຄຸນນະພາບຂອງການປິ່ນປົວທີ່ດີຂຶ້ນ ແລະ ຜົນໄດ້ຮັບທີ່ດີຂຶ້ນສໍາລັບຄົນເຈັບຂອງພວກເຮົາ. ທຸກບາດກ້າວຂອງການພັດທະນາລ້ວນແລ້ວແຕ່ເປັນການຊ່ວຍຊີວິດ ແລະ ຮັກສາສຸຂະພາບຂອງປະຊາຊົນບັນດາເຜົ່າທັງໝົດ.” ພ້ອມທັງສະແດງຄວາມຂອບໃຈມາຍັງລັດຖະບານອົດສະຕຣາລີ ສໍາລັບການຊ່ວຍເຫລືອທີ່ສໍາຄັນແກ່ໂຮງໝໍແຂວງຂອງພວກເຮົາໃນຄັ້ງນີ້ ເຊິ່ງເປັນການປະກອບສ່ວນໃນວຽກງານການປິ່ນປົວຜູ້ທີ່ເປັນພະຍາດໝາກໄຂ່ຫລັງ ແລະ ຄົນເຈັບຜູ້ອື່ນໆ ກໍຈະໄດ້ຮັບຜົນປະໂຫຍດຢ່າງຫຼວງຫລາຍ ເຊັ່ນດຽວກັນ.”

ສະແດງຄຳຄິດເຫັນ