ເຈົ້າໜ້າທີ່ແຂວງສາລະວັນ ກວດຈັບຢາເສບຕິດທີ່ຝາກມານຳລົດເມ
ເຈົ້າໜ້າທີ່ ຈະລາຈອນ ປກສ ແຂວງສາລະວັນ ປະຈຳປ້ອມຖ້ຳພວງ ສາມາດກວດຈັບຢາເສບຕິດທີ່ຝາກມານຳລົດເມ ລົງແຂວງພາກໃຕ້ ໄດ້ເຖິງ 3 ລາຍ ໃນເດືອນ ມິຖຸນາ 2023.
ໃນຄັ້ງວັນທີ 8 ມິຖຸນາ 2023 ຈະລາຈອນ ປກສ ແຂວງສາລະວັນ ໄດ້ກັກໂຕ ທ້າວ ອຳນວຍ ອາຍຸ 48 ປີ, ບ້ານງິ້ວ, ເມືອງຊະນະສົມບູນ, ແຂວງຈໍາປາສັກ ຢາບ້າ 5 ມັດພ້ອມລົດຈັກ 1 ຄັນ, ເຊີ່ງຜູ້ກ່ຽວແມ່ນເອົາລົດຈັກໃສ່ລົດເມ ມາແຕ່ເມືອງຄໍາເກີດ ( ຫຼັກ20 ) ແລະ ໃນເວລາດຽວກັນ ຍັງໄດ້ກວດລົດຈັກທີ່ໄດ້ເຊື່ອງໄວ້ຢູ່ພາຍໃນລົດເມ ພົບເຫັນຢາບ້າ ອີກຈຳນວນ 7 ແພັກ ຕິດມາໃນລົດເມຄັນດຽວກັນ ຈາກນັ້ນໄດ້ສອບສວນຜູ້ຂັບລົດເມຈຶ່ງໄດ້ຮູ້ວ່າຢາບ້າຈໍານວນດັ່ງກ່າວເປັນຂອງທ້າວແດງ ອາຍຸ 20 ປີ,ບ້ານກອງຄຳ, ເມືອງປາກກະດິງ ແຂວງບໍລິຄຳໄຊ .
ຕໍ່ມາ ໃນຄັ້ງວັນທີ 16 ມິຖຸນາ 2023 ເຈົ້າໜ້າທີ່ພະແນກຕໍາຫຼວດຈະລາຈອນ, ປ້ອມຖໍ້າພວງ ໄດ້ກວດລົດໂດຍສານພົບກ່ອງເຄື່ອງຕ້ອງສົງໃສ ທີ່ຝາກມານຳລົດເມ ສາຍນະຄອນຫຼວງວຽງຈັນ-ອັດຕະປື ພົບ ຢາບ້າ ຈຳນວນ 5 ຖົງ ເຊີ່ງເຄື່ອງດັ່ງກ່າວ ແມ່ນຝາກແຕ່ ນະຄອນຫຼວງວຽງຈັນ ລົງປາຍທາງແຂວງອັດຕະປື.
ເມື່ອລົດເມ ມາຮອດຄິວອັດຕະປື ຈື່ງໂທຕິດຕໍ່ໃຫ້ເຈົ້າຂອງກ່ອງເຄື່ອງມາຮັບເອົາແລ້ວເຈົ້າໜ້າທີ່ໄດ້ສະແດງຕົວເຂົ້າຈັບກຸມ ທ້າວ ແລ້ບເຕີ, ອາຍຸ 29 ປີ,ບ້ານທ່າເດື່ອ, ເມືອງສະໜາມໄຊ, ແຂວງອັດຕະປື ພ້ອມຂອງກາງ ປະເພດຢາບ້າ ຈໍານວນ 5 ຖົງ.
ຕົກມາຮອດວັນທີ 20 ມິຖຸນາ 2023 ໄດ້ກວດລົດກະບະລີໂວ້, ກວ 3529 ເຊິ່ງອອກຊື່ທ້າວ ພຸດ ອຸດົມພອນ, ບ້ານນາລ່ຽນ, ເມືອງຊາຍທອງ, ນະຄອນຫຼວງວຽງຈັນ, ຜູ້ຂັບຂີ່ຂີ່ລົດຫລົບຫນີ ອລະ ຖີ້ມລົດ ພົບຢາ ເຮໂຣອິນ ຈໍານວນ 93 ແທ່ງ ຖີ້ມໄວ້ຢູ່ໃນປ່າ ສ່ວນຜູ້ຂັບຂີ່ແມ່ນໄດ້ເອົາຕົວຫຼົບໜີກ່ອນແລ້ວ.
