ທ້າວ ສະຖາພອນ ສິມມາລາວົງ ຫຼື ໂຢ ນັກກິລາເທັນນິດ ມື 2 ປະເທດລາວ ຊຶ່ງຫາກໍສ້າງຜົນງານພົ້ນເດັ່ນ ຄວ້າແຊ໋ມກິລາເທັນນິດລະດັບຊາດ ຫຼື ລາຍການ ນໍ້າດື່ມຫົວເສືອ ໂອເພັນ 2023 ເປັນຄັ້ງທຳອິດ ມາໃໝ່ໆໝາດໆ ເຂົ້າຮ່ວມການແຂ່ງຂັນເທັນນິດ ລະດັບອາຊີບ ລາຍການ ສິງ ແຊ໋ມປ້ຽນຊິບ 2023 ຫຼື “Singha Championship 2023” ທີ່ເມືອງພັດທະຍາ ແຂວງຊົນບູຣີ ປະເທດໄທ ລະຫວ່າງວັນທີ 25 ມິຖຸນາ ຫາ 2 ກໍລະກົດ 2023.

ທ້າວ ສະຖາພອນ ສິມມາລາວົງ ແຈ້ງໃຫ້ທີມງານນັກຂ່າວໜັງສືພິມສຶກສາ, ວິທະຍາສາດ ແລະ ກິລາ ອອນລາຍ ຮູ້ວ່າ: ໃນປັດຈຸບັນ ນ້ອງໄດ້ເຂົ້າຮ່ວມການແຂ່ງຂັນກິລາເທັນນິດ ລະດັບອາຊີບ ລາຍການ ສິງ ແຊ໋ມປ້ຽນຊິບ 2023 ຫຼື “Singha Championship 2023” ທີ່ເມືອງພັດທະຍາ ແຂວງຊົນບູຣີ ປະເທດໄທ ລະຫວ່າງວັນທີ 25 ມິຖຸນາ ຫາ 2 ກໍລະກົດ 2023 ຊຶ່ງລາຍການນີ້ ມີຫຼາຍປະເທດເຂົ້າຮ່ວມຊີງໄຊ ປະກອບມີ ສປ ຈີນ, ມາເລເຊຍ, ອິນເດຍ, ຫວຽດນາມ, ກຳປູເຈຍ, ຣັດເຊຍ, ລາວ ແລະ ໄທ ເຈົ້າພາບ ໂອຍນ້ອງເອງເປັນນັກກິລາເທັນນິດໜຶ່ງດຽວຈາກສປປ ລາວ

ເຂົ້າຮ່ວມແຂ່ງຂັນ ສອງລາຍການ ກໍຄື ປະເພດດ່ຽວຊາຍ ແລະ ຄູ່ຊາຍ ຊຶ່ງຕົວນ້ອງເອງໄດ້ລົງແຂ່ງຂັນປະເພດຊາຍດ່ຽວໄປແລ້ວ ແລະ ເສຍໃຫ້ ນັກກິລາມື 2 ຂອງລາຍການ ເປັນນັກກິລາຈາກເຈົ້າພາບ ໄທ 0-2 ເຊັດ 4-6 ແລະ 1-6 ຄະແນນ ຕົກຮອບແລ້ວ ສ່ວນຜົນງານປະເພດຄູ່ຊາຍ ນ້ອງໄດ້ຈັບຄູ່ກັບ ທ້າວ ທະນາກອນ ສີລິຮັດ ນັກກິລາຈາກໄທ ມືວາງອັນດັບທີ 6 ຂອງລາຍການ ແລະ ຜົນງານຂອງພວກນ້ອງແມ່ນສາມາດເອົາຊະນະຄູ່ນັກກິລາໄທ ມາແລ້ວ 1 ແລະ ຍັງຈະລົງແຂ່ງຂັນໃນຕອນແລງວັນທີ 29 ມິຖຸນາ 2023 ພົບກັບ ຄູ່ຂອງນັກກິລາໄທອີກ ຊຶ່ງລາຍການນີ້ມີທັງໝົດ 16 ທີມເຂົ້າຮ່ວມ ສ່ວນຜົນງານຈະເປັນແນວໃດນັ້ນ ຈະຂໍລາຍງານໃຫ້ຮູ້ຕື່ມອີກ.

ແນວໃດກໍຕາມ, ນອກຈາກການເຂົ້າຮ່ວມແຂ່ງຂັນຂອງ ສະຖາພອນ ສິມມາລາວົງ ໃນລາຍການດັ່ງກ່າວແລ້ວ ໃນການເຄື່ອນໄຫວຂອງ ສະຖາພອນ ສິມມາລາວົງ ໃນຕໍ່ໜ້າ ຍັງມີແຜນຈະເຂົ້າຮ່ວມແຂ່ງຂັນລາຍການຂອງສະຫະພັນເທັນນິດສາກົນ ຫຼື ITF ເພື່ອເກັບຄະແນນສະສົມອັນດັບໂລກຕື່ມອີກ ໂດຍສະເພາະທ້າຍປີນີ້ ແມ່ນຈະເຂົ້າຮ່ວມແຂ່ງຂັນລາຍການລະດັບອາຊີບ ຂອງທະວີບອາຊີ ຊຶ່ງຈະຈັດຂຶ້ນທີ່ປະເທດ ໄທ, ສສ ຫວຽດນາມ, ອິນໂດເເນເຊຍ ແລະ ສປ ຈີນ. ພ້ອມກັນນັ້ນ, ກໍຍັງຈະໄດ້ຫ້າງຫາກະກຽມຈະເຂົ້າຮ່ວມແຂ່ງຂັນລາຍການ ເດວິດ ຄັບ ທີ່ປະເທດບາເຣນ ອີກດ້ວຍ.

ສຳລັບ ຜົນງານຂອງ ສະຖາພອນ ສິມມາລາວົງ ໃນການເຂົ້າຮ່ວມແຂ່ງຂັນລະດັບຊາດ ກໍຄື ລະດັບພາຍໃນປະເທດ ໂດຍສະເພາະໃນລາຍການ ນໍ້າດື່ມຫົວເສືອ ໂອເພັນ 2023 ໃນໄລຍະຜ່ານມາ ແມ່ນໄດ້ເຂົ້າຊີງຊະນະເລີດທຸກປີ ແຕ່ໜ້າເສຍໄດ້ອັນດັບທີ 2 ຊຶ່ງປີນີ້ ກໍສາມາດແຈ້ງເກີດ ດ້ວຍການເອົາຊະນະ ວິທະຍາ ຣາຊາວະດີ ນັກກິລາເທັນນິດມື 1 ປະເທດລາວ ຄວ້າແຊ໋ມເປັນຄັ້ງທຳອິດ ສ່ວນຜົນງານໃນງານກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ ເມື່ອທ້າຍປີ 2022 ສະຖາພອນ ສິມມາລາວົງ ກໍສາມາດຍາດໄດ້ 3 ຫຼຽນຄຳ ຈາກປະເພດຄູ່ຊາຍ, ຄູ່ປະສົມ ແລະ ປະເພດທີມຊາຍ.

ສະແດງຄຳຄິດເຫັນ