ລັດຖະບານລາວ ແລະ ບໍລິສັດ AMI Renewables Quảng Bình Investment ຈາກຫວຽດນາມ ເຊັນສັນຍາຮ່ວມກັນພັດທະນາໂຄງການໂຮງງານໄຟຟ້າພະລັງງານລົມ ທີ່ແຂວງສະຫວັນນະເຂດໃນພື້ນທີ່ ກວ່າ 2 ພັນເຮັກຕາ ແລະ ມູນຄ່າການລົງທຶນກວ່າ 2 ພັນລ້ານໂດລາ.

ໂດຍພິທີເຊັນສັນຍາດັ່ງກ່າວຈັດຂື້ນເມື່ອບໍ່ດົນມານີ້,  ຕາງໜ້າລັດຖະບານລາວລົງນາມໂດຍ ທ່ານ ປອ ສະຖາບັນດິດ ອິນຊີຊຽງໃໝ່  ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ Nguyễn Nam Thắng ປະທານບໍສັດAMI Renewables Quảng Bình Investment .

ໂຄງການພະລັງງານລົມໃນແຂວງສະຫວັນນະເຂດນີ້ ຈະສາມາດບັນຈຸໄຟຟ້າໄດ້ເຖິງ 1,220MW ເຊິ່ງເປັນອີກສ່ວນໜຶ່ງໃນໂຄງການຂອງລັດຖະບານລາວ ທີ່ຈະສົ່ງອອກພະລັງງານໄຟຟ້າໃຫ້ກັບຫວຽດນາມໃນປີ 2025. ເຊິ່ງໂຄງການດັ່ງກ່າວຍັງຖືເປັນໂຄງການທີ່ໃຫຍ່ທີ່ສຸດຂອງ ຫວຽດນາມທີ່ມາລົງທຶນຢູ່ລາວ.

ໃນພິທີເຊັນສັນຍາ ທ່ານ ປອ ສະຖາບັນດິດ ອິນຊີຊຽງໃໝ່  ໄດ້ເນັ້ນຢໍ້າໃຫ້ ບໍລິສັດ ທີ່ມາລົງທຶນ ສືບຕໍ່ເຮັດວຽກຮ່ວມກັບອົງການຈັດຕັ້ງທ້ອງຖິ່ນຢ່າງໜັກແໜ້ນ ເພື່ອຮັບປະກັນໃຫ້ໂຄງການດັ່ງກ່າວສຳເລັດຕາມເວລາທີ່ກຳນົດໄວ້ ແລະ ຕ້ອງປະຕິບັດຕາມສິດ ແລະ ພັນທະທັງໝົດທີ່ໄດ້ກຳນົດໄວ້.

ທ່ານ Nguyễn Nam Thắng ກໍໄດ້ເຫັນດີເປັນເອກະພາບ ແລະ ຈະປະຕິບັດຕາມບັນດາເງື່ອນໄຂ ແລະ ຂໍ້ກຳນົດ ພ້ອມຈະສົ່ງເສີມຊຸກຍູ້ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ ຫວຽດນາມ.

ໃນເດືອນທັນວາ 2022, ບໍລິສັດ AMI Renewables Quang Binh ແລະ ລັດຖະບານລາວ ໄດ້ລົງນາມໃນບົດບັນທຶກຄວາມເຂົ້າໃຈ (MoU) ເພື່ອດໍາເນີນການສຶກສາຄວາມເປັນໄປໄດ້ໂຄງການພັດທະນາຟາມລົມຢູ່ແຂວງສະຫວັນນະເຂດຂອງລາວ. ​ໄລຍະ​ທຳ​ອິດ​ຂອງ​ໂຮງງານ, ຄາດ​ວ່າ​ຈະ​ຜະລິດ​ໄດ້​ປະມານ 252 MW, ​ໃນ​ເນື້ອ​ທີ່ 2,687 ​ເຮັກຕາ.

ໂຄງການດັ່ງກ່າວໄດ້ຖືກບັນຈຸເຂົ້າໃນບົດບັນທຶກກອງປະຊຸມຂອງຄະນະກຳມາທິການລະຫວ່າງລັດຖະບານ ລາວ-ຫວຽດນາມ ໃນຕົ້ນປີ 2023 ທີ່ຜ່ານມາ ແລະ ໄດ້ມີການຈັດຕັ້ງປະຕິບັດຮ່ວມກັນໂດຍລັດຖະບານສອງປະເທດ. ໂຄງການດັ່ງກ່າວໄດ້ຮັບການອະນຸມັດຈາກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ກະຊວງພະລັງງານ ແລະ ບໍ່ແຮ່ຂອງລາວ ໃນການປະເມີນຜົນກະທົບດ້ານສິ່ງແວດລ້ອມ ແລະ ​ໄດ້​ເພີ່ມ​ເຂົ້າ​ໃນ​ບັນຊີ​ລາຍ​ຊື່​ໂຄງການ​ສົ່ງ​ອອກ​ໄຟຟ້າ​ຈາກ​ລາວ​ໄປ​ຫວຽດນາມ​ໃນ​ປີ 2025. ໂດຍໂຄງການດັ່ງກ່າວ ຄາດວ່າຈະເລີ່ມລົງມືກໍ່ສ້າງ ແລະ ປະຕິບັດໃນໄຕມາດ ທີ 2 ຂອງປີ 2024 ແລະ ຄາດວ່າຈະສາມາດຜະລິດໄຟຟ້າສົ່ງອອກໄປໃຫ້ຫວຽດນາມໄດ້ໃນໄຕມາດທີ 4 ຂອງປີ 2025.

​ໂຄງການ​ໂຮງງານ​ໄຟຟ້າ​ພະລັງ​ງານ​ລົມ ຢູ່ສະຫວັນນະເຂດ ໄດ້​ກາຍ​ເປັນ​ສັນຍາ​ລັກ​ແຫ່ງ​ຄວາມ​ສາມັກຄີ​ອັນ​ແໜ້ນ​ແຟ້ນ ​ແລະ ການ​ຮ່ວມ​ມື​ຮອບດ້ານ​ລະ​ຫວ່າງ ສປປ ລາວ ແລະ ສສ ຫວຽດນາມ. ນອກຈາກນີ້ ​ໂຄງການ​ດັ່ງກ່າວຈະ​ຊຸກຍູ້​ການ​ພັດທະນາ​ເສດຖະກິດ, ​ເພີ່ມ​ທະວີ​ຄວາມ​ໝັ້ນຄົງ​ດ້ານ​ພະລັງງານ, ຊຸກຍູ້​ການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ​ຢູ່​ເຂດ​ກວາງ​ບິ່ງ ລຽບ​ຕາມ​ຊາຍ​ແດນ​ຫວຽດນາມ – ລາວ.

ທີ່ມາ ໜັງສືພິມວຽງຈັນທາຍ

ສະແດງຄຳຄິດເຫັນ