ເຈົ້າໜ້າທີ່ ປກສ ເມືອງ ຕົ້ນເຜິ້ງ ແຂວງບໍ່ແກ້ວ ໄດ້ກັກຕົວ ທ້າວ ຈ້າວຢຸ່ນຊ່ານ ອາຍຸ 36 ປີ, ເຊື້ອຊາດຈີນ, ສັນຊາດຈີນ ຊຶ່ງປະຈຸບັນ ຢູ່ບ້ານ ຫ່າງປ້າງ ເມືອງ ມົງໂປຊຽນ ແຂວງ ເມິງໂປ ປະເທດມຽນມາ ພ້ອມຂອງກາງຢາເສບຕິດຫຼາຍລາຍການ ເຊັ່ນ: ຢາບ້າຈຳນວນ 103 ເມັດ, ຢາເຄຕາມິນຈຳນວນ 1 ຖົງໃຫຍ່ ແລະ 1 ຖົງນ້ອຍ, ຢາອີ ຈຳນວນ 52 ເມັດ, ຂາຄູ່ຈຳນວນ 94 ຖົງໃຫຍ່ ແລະ 298 ຖົງນ້ອຍ, ແປ້ງຝຸ່ນ ຈຳນວນ 6 ຖົງນ້ອຍ, ຄໍລາເຈັນ ຈຳນວນ 29 ຊອງ, ຢາເມັດສີສົ້ມ ຈໍານວນ 23 ເມັດ ແລະ ຢາເມັດສີບົວ ຈໍານວນ 8 ເມັດ, ນໍ້າສີດໍາ ຈຳນວນ 2 ຕຸກໃຫຍ່ ແລະ 1 ຕຸກນ້ອຍ, ແປ້ງຝຸ່ນສີນ້ຳຕານ ຈຳນວນ 1 ກະປູກ.

ຈຸດກວດພົບຂອງກາງຢາເສບຕິດດັ່ງກ່າວ ແມ່ນຢູ່ທີ່ຈຸດກວດການໍ້າເກິງ ເມືອງ ຕົ້ນເຜິ້ງ ແຂວງ ບໍ່ແກ້ວ ມີຜູ້ຊາຍ 1 ຄົນ ຂີ່ລົດໂດຍສານມາແຕ່ ເມືອງ ຕົ້ນເຜິ້ງ ເພື່ອທີ່ຈະເດີນທາງເຂົ້າເມືອງຫ້ວຍຊາຍ ໂດຍຜ່ານຈຸດກວດການ້ຳເກິງ, ເຈົ້າໜ້າທີ່ ຈຶ່ງໄດ້ສັນຍານໃຫ້ຈອດລົດ ເພື່ອກວດກາເອກະສານລົດ ແລະ ຕົວຕົນຜູ້ໂດຍສານ ແລະ ໄດ້ພົບເຫັນຢາເສບຕິດຢູ່ໃນກະເປົ໋າຂອງທ້າວ ຈ້າວຢຸ່ນຊ່ານ ໃນວັນທີ 6 ກຸມພາ 2024 ຜ່ານມານີ້.

ເຈົ້າໜ້າທີ່ຢູ່ຈຸດກວດກາດັ່ງກ່າວ ຈຶ່ງໄດ້ກັກຕົວຜູ້ກ່ຽວພ້ອມກັບຂອງກາງສົ່ງໃຫ້ພະແນກທີ່ກ່ຽວຂ້ອງ ເພື່ອດໍາເນີນຕາມລະບຽບກົດໝາຍ.

ແຫຼ່ງຂ່າວ: ປກສ ແຂວງບໍ່ແກ້ວ

ສະແດງຄຳຄິດເຫັນ