ທ້າວ ແຫຼ້ ລັດສົມບັດ ອາຍຸ 49 ປີ, ອາຊີບເຮັດນາ ຊຶ່ງປະຈຸບັນ ຢູ່ບ້ານ ດົງຄຸງ ເມືອງໜອງບົກ ແຂວງຄຳມ່ວນ ໄດ້ລົງມືກໍ່ເຫດຄາຕະກຳຜູ້ເປັນເມຍ ຊື່ນາງ ບຸນພັກ ລັດສົມບັດ (ແດງ) ອາຍຸ 29 ປີ ສາເຫດຍ້ອນເມຍຖາມປະ ແລະ ຂໍເງິນຈຳນວນ 30 ລ້ານກີບ ແຕ່ເມຍບໍ່ໃຫ້.

ໃນວັນທີ 15 ກຸມພາ 2024 ຜ່ານມານີ້, ເຈົ້າໜ້າທີ່ພະແນກຕຳຫຼວດໜ່ວຍງານຄະດີອາຍາ-ເສດຖະກິດ ປກສ ເມືອງໜອງບົກ ແຂວງຄຳມ່ວນ ໄດ້ນຳຕົວທ້າວ ແຫຼ້ ລັດສົມບັດ ໄປເຮັດຈຳລອງເຫດການຄືນ ຫຼັງຈາກກໍ່ເຫດການຄາຕະກຳຜູ້ເປັນເມຍໃນວັນທີ 11 ກຸມພາ 2024 ຜ່ານມານີ້.

ທ້າວ ແຫຼ້ ຮັບສາລະພາບໃນເບື້ອງຕົ້ນວ່າ: ໃນຕົ້ນເດືອນກຸມພານີ້ ໄດ້ຂໍເງິນນຳນາງ ບຸນພັກ (ເມຍ) ຈຳນວນ 5 ລ້ານກີບ ເພື່ອໄປແຕ່ງເຄື່ອງສຽງລົດແຕ່ເມຍບໍ່ໃຫ້, ຈົນຜູ້ກ່ຽວເກີດຄວາມນ້ອຍໃຈຄິດວ່າເມຍຢາກປະຖິ້ມຕົນ, ຕໍ່ມາວັນທີ 10 ກຸມພາ ນາງ ບຸນພັກ ໄດ້ຂໍຢ່າຮ້າງກັບຕົນ ແລະ ວັນຕໍ່ມາ ທັງສອງຄົນ ໄດ້ລົມເລື່ອງຢ່າຮ້າງກັນ ທ້າວແຫຼ້ ໄດ້ຂໍເງິນນຳເມຍ 30 ລ້ານກີບ ແຕ່ເມຍບໍ່ໃຫ້, ຈຶ່ງເກີດຜິດຖຽງກັນຢ່າງຮ້າຍແຮງ, ຜູ້ກ່ຽວຈຶ່ງຍ່າງເຂົ້າໄປເອົາພ້າຂໍ ຢູ່ຫ້ອງນອນມາຟັນ ໃສ່ຫົວ, ຟັນແຂນ ແລະ ຟັນກ້ານຄໍ, ນາງ ບຸນພັກ ໄດ້ຮ້ອງຂໍຄວາມຊ່ວຍຫຼືອຈາກຄົນໃກ້ຄຽງ ເຮັດໃຫ້ທ້າວ ຕ້ອມ ອາຍຸ 13 ປີຜູ້ເປັນລູກທີ່ນັ່ງຢູ່ໜ້າເຮືອນໄດ້ຍິນຈຶ່ງໄດ້ແລ່ນເຂົ້າໄປເບິ່ງ ເຫັນພໍ່ໄດ້ໃຊ້ພ້າຂໍຟັນແມ່ ຈົນມີເລືອດອອກ, ເມື່ອທ້າວແຫຼ້ ເຫັນແນວນັ້ນ ໄດ້ຖິ້ມພ້າ ແລ້ວແລ່ນໜີອອກໄປທາງຫລັງເຮືອນ. ສ່ວນທ້າວ ຕ້ອມ ຜູ້ເປັນລູກ ກໍໄດ້ແລ່ນຂຶ້ນມາຂໍຄວາມຊ່ວຍເຫລືອຈາກປະຊາຊົນໃນບ້ານເພື່ອຊ່ວຍແມ່ສົ່ງໄປໂຮງໝໍ ແຕ່ກໍຊ່ວຍໄວ້ບໍ່ທັນ ເນື່ອງຈາກໄດ້ຮັບບາດເຈັບ ແລະ ເສຍເລືອດຫຼາຍ ຈຶ່ງເຮັດໃຫ້ເສຍຊີວິດຄາທີ່.

ຮອດເວລາ 17:30 ໂມງຂອງວັນດຽວກັນ ທ້າວແຫຼ້ ໄດ້ເຂົ້າໄປມອບຕົວ ກັບທາງເຈົ້າໜ້າທີ່ ປກສ ກຸ່ມໜອງຜຳ, ເຈົ້າໜ້າທີ່ກັກຕົວໄວ້ ແລ້ວມອບຕໍ່ໃຫ້ ປກສ ເມືອງໜອງບົກ ສົ່ງໄປເຮັດການສອບສວນ-ສືບສວນ ພ້ອມນຳຕົວໄປດຳເນີນຄະດີຕາມລະບຽບກົດໝາຍ.

ແຫຼ່ງຂ່າວ: ປກສ ຄຳມ່ວນ

ສະແດງຄຳຄິດເຫັນ