ທະນາຄານພັດທະນາ ອາຊີ Asian Development Bank (ADB) ຄາດຄະເນວ່າ ເສດຖະກິດ ສປປ ລາວ ຈະມີການເຕີບໂຕໃນລະດັບ ປານກາງ ໃນປີ 2024 ນີ້ ແລະ ປີ ໜ້າ ຈາກແຮງສະໜັບສະໜູນຈາກພາຍນອກ ເຊັ່ນ: ການທ່ອງທ່ຽວ, ການລົງທຶນ ແລະ ການຄ້າ. ທ່າມກາງຄວາມກົດດັນຈາກພາວະເງິນເຟີ້ ແລະ ພັນທະທີ່ຕ້ອງຊຳລະໜີ້ ໃຫ້ກັບຕ່າງປະເທດ.

ບົດລາຍງານເສດຖະກິດປະຈຳເດືອນ ເມສາ ຂອງ ADB ລະບຸວ່າ GDP ຂອງ ສປປ ລາວ ໃນປີ 2024 ແລະ 2025 ຈະມີການຂະຫຍາຍຕົວປະມານ 4%. ໂດຍໄດ້ຮັບແຮງສະໜັບສະໜູນຈາກຄວາມຕ້ອງການພາຍນອກ ໃນຂະແໜງການບໍລິການ ເຊັ່ນ: ການທ່ອງທ່ຽວ ທີ່ຄາດວ່າຈະມີນັກທ່ອງທ່ຽວເຂົ້າມາເຖິງ 4,2ລ້ານຄົນໃນປີ 2024 ແລະ ຍັງຈະໄດ້ຜົນປະໂຫຍດຈາກການພັດທະນາພື້ນຖ່ານໂຄ່ງລາງໃນການເດີນທາງທີ່ງ່າຍຂຶ້ນ.

ADB ລະບຸຕື່ມອີກວ່າ ນອກນີ້ ຍັງຈະໄດ້ຮັບການລົງທຶນຈາກຕ່າງປະເທດຫຼາຍຂຶ້ນ ໂດຍສະເພາະໃນໂຄງການພະລັງງານສະອາດຕ່າງໆເຊິ່ງຈະເປັນແຮງສະໜັບສະໜູນສຳຄັນໃນການຊຸກຍູ້ການຂະຫຍາຍຕົວຂອງອຸດສາຫະກຳຂອງ ສປປ ລາວ.

ແຕ່ຢ່າງໃດກໍຕາມ, ທ່າມກາງການຂະຫຍາຍຕົວທາງເສດຖະກິດຂອງ ສປປ ລາວ ທະນາຄານພັດທະນາອາຊີ ກໍຍັງລະບຸວ່າ ອັດຕາເງິນເຟີ້ທີ່ເພີ່ມຂຶ້ນຢ່າງຕໍ່ເນື່ອງ, ເງິນກີບທີ່ອ່ອນຄ່າ ແລະ ໜີ້ສິນສາທາລະນະຍັງຄົງເປັນສິ່ງທ້າທາຍທີ່ສໍາຄັນສໍາລັບການພັດທະນາຂອງ ສປປ ລາວ.

ຜູ້ອຳນວຍການ ADB ປະຈຳ ສປປ ລາວ, ທ່ານ Sonomi Tanaka ກ່າວວ່າ: “ຄວາມກົດດັນຈາກໜີ້ສິນທີ່ບໍ່ຍືນຍົງ ແລະ ອັດຕາເງິນເຟີ້ສູງທີ່ສູງ, ອາດເຮັດໃຫ້ຈັງຫວະການຟື້ນຕົວຂອງເສດຖະກິດໂດຍລວມຂອງປະເທດຫຼຸດລົງ,”

ຄວາມກົດດັນຂອງອັດຕາເງິນເຟີ້ຄາດວ່າຈະຍັງຄົງຢູ່ຍ້ອນວ່າທຸລະກິດຂຶ້ນລາຄາເພື່ອຊົດເຊີຍຄ່າໃຊ້ຈ່າຍທີ່ສູງຂຶ້ນເຊິ່ງເປັນຜົນມາຈາກການອ່ອນຄ່າຂອງເງິນກີບ ແລະ ການເພີ່ມຄ່າຈ້າງ. ລາຄາຜູ້ບໍລິໂພກຄາດວ່າຈະເພີ່ມຂຶ້ນໂດຍສະເລ່ຍ 20% ໃນປີ 2024, ຄ່ອຍໆຫຼຸດລົງເປັນ 7%ໃນປີ 2025.

ອີງຕາມຂໍ້ມູນຈາກ ສູນສະຖິຕິແຫ່ງຊາດ, ອັດຕາເງິນເຟີ້ໃນລາວຢືນຢູ່ທີ່ 24.9% ໃນເດືອນມີນາ ເຊິ່ງເພີ່ມຂຶ້ນ 1.3% ຈາກເດືອນກຸມພາ ແລະ ເພີ່ມຂຶ້ນ 25% ເມື່ອທຽບໃສ່ໄລຍະດຽວກັນຂອງປີ 2023.

ທະນາຄານພັດທະນາອາຊີ ລະບຸວ່າ ອັດຕາເງິນເຟີ້ ທີ່ເພີ່ມຂຶ້ນ ເຮັດໃຫ້ລາຄາອາຫານ, ການບໍລິການ ໂຮງແຮມ ແລະ ຮ້ານອາຫານເພີ່ມ ສູງກວ່າລາຍຮັບຂອງແຮງງານ ເຮັດໃຫ້ກຳລັງຊື້ສ່ວນໃຫຍ່ພາຍໃນປະເທດນັ້ນ ຫຼຸດລົງ.

ການຫຼຸດລົງຂອງກໍາລັງການຊື້ຂອງຄົວເຮືອນມີຜົນສະທ້ອນຢ່າງຫຼວງຫຼາຍຕໍ່ອະນາຄົດຂອງເສດຖະກິດລາວ. ADB ກ່າວວ່າ ນັກຮຽນຈະອອກໂຮງຮຽນຫຼາຍຂຶ້ນ ແລະ ການເຄື່ອນຍ້າຍແຮງງານອາດຈະເພີ່ມຂຶ້ນເມື່ອຄົນຊອກຫາໂອກາດການຈ້າງງານຢູ່ບ່ອນອື່ນ.

ທີ່ມາ VientianeTimes

ສະແດງຄຳຄິດເຫັນ