ມົສໂກ 8 ພຶດສະພາ — ປະທານາທິບໍດີສີ ຈິ້ນຜິງ ຂອງຈີນ ກ່າວວັນນີ້ວ່າຈີນພ້ອມເຮັດວຽກຮ່ວມກັບລັດເຊຍເພື່ອປົກປ້ອງອຳນາດໜ້າທີ່ແລະສະຖານະຂອງສະຫະປະຊາຊາດ ຫຼື ຢູເອັນ (UN) ລວມເຖິງມຸ່ງໝັ້ນປົກປ້ອງສິດຜົນປະໂຫຍດຂອງທັງສອງຊາດແລະກຸ່ມປະເທດກຳລັງພັດທະນາ ທ່າມກາງການກະທຳພຽງຝ່າຍດຽວແລະການກັ່ນແກ້ງ

 

ສຳນັກຂ່າວຊິນຫົວ ລາຍງານວ່າ ທ່ານສີ ຈິ້ນຜິງ ໄດ້ຫາລືກັບປະທານາທິບໍດີວລາດິເມຍ ປູຕິນ ຜູ້ນຳລັດເຊຍ ແລະ ລະບຸວ່າຝ່າຍຈີນຈະເຮັດວຽກຮ່ວມກັບລັດເຊຍເພື່ອແບກຮັບຄວາມຮັບຜິດຊອບພິເສດໃນຖານະສອງປະເທດໃຫຍ່ຂອງໂລກ ແລະສະມາຊິກຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ຫຼື ຢູເອັນເອສຊີ (UNSC).

 

ຂະນະດຽວກັນທ່ານສີ ຈິ້ນຜິງ ກະຕຸ້ນທັງສອງປະເທດຮ່ວມສົ່ງເສີມມຸມມອງທາງປະຫວັດສາດທີ່ຖືກຕ້ອງກ່ຽວກັບສົງຄາມໂລກຄັ້ງທີ 2 ແລະ ສົ່ງເສີມໂລກຫຼາຍຂັ້ວທີ່ສະເໜີພາກ ແລະ ເປັນລະບຽບ ແລະ ໂລກາພິວັດທາງເສດຖະກິດທີ່ເປັນປະໂຫຍດແລະ ຄອບຄຸມທົ່ວໂລກ.

 

ທ່ານສີ ຈິ້ນຜິງ ເດີນທາງເຖິງກຸງມົສໂກເມື່ອວັນພຸດ (7 ພຶດສະພາ) ເພື່ອຢ້ຽມຢາມລັດເຊຍຢ່າງເປັນທາງການ ແລະ ເຂົ້າຮ່ວມງານສະເຫຼີມສະຫຼອງວາລະຄົບຮອບ 80 ປີ ໄຊຊະນະແຫ່ງມະຫາສົງຄາມຜູ້ຮັກຊາດແຫ່ງສະຫະພາບໂຊວຽດ ຫຼື ວັນແຫ່ງໄຊຊະນະ.

ສະແດງຄຳຄິດເຫັນ