ພະແນກແຮງງານ ແລະ ສະຫວັດດີການສັງຄົມແຂວງ ຂໍແຈ້ງມາຍັງທ່ານ ຊາບວ່າ: ເມືອງອັນດອງ ສ ເກົາຫຼີ ໄດ້ ສະແດງເຈດຈໍານົງ ໃນການນໍາໃຊ້ແຮງງານຂອງເມືອງໄຊຍະບູລີ, ເມືອງພຽງ ແລະ ເມືອງຄອບ ແຂວງໄຊຍະບູລີ ເພື່ອໄປ ເຮັດວຽກຕາມລະດູການຢູ່ເມືອງດັ່ງກ່າວ ໃນຊ່ວງຕົ້ນເດືອນກໍລະກົດ 2023; ສະນັ້ນ ເພື່ອເປັນການກະກຽມຄວາມພ້ອມ ແລະ ຮັບປະກັນໃຫ້ແກ່ການຄັດເລືອກແຮງງານທີ່ມີຄຸນນະພາບ ແລະ ຖືກຕ້ອງຕາມຈຸດປະສົງຂອງນາຍຈ້າງ, ພະແນກ ແຮງງານ ແລະ ສະຫວັດດີການສັງຄົມແຂວງແຈ້ງມາຍັງທ່ານ ເພື່ອປະກາດຮັບສະຫມັກ ແລະ ຂື້ນທະບຽນ ແຮງງານ ມີ ລາຍລະອຽດລຸ່ມນີ້ :

1. ໃຫ້ຫ້ອງການແຮງງານ ແລະ ສະຫວັດດີການສັງຄົມເມືອງ ລາຍງານຕໍ່ການນໍາຂອງເມືອງ ຮັບຊາບ ພ້ອມທັງຂໍ ທິດຊີ້ນໍາໃນການຈັດຕັ້ງປະຕິບັດ ແລ້ວສົມທົບກັບພາກສ່ວນທີ່ກ່ຽວຂ້ອງ ເພື່ອໂຄສະນາເຜີຍແຜ່ໃຫ້ແຮງງານຢູ່ພາຍໃນ ເມືອງຂອງຕົນໄດ້ຮັບຮູ້ຢ່າງກວ້າງຂວາງ, ຖ້າບຸກຄົນໃດມີຄວາມສົນໃຈຢາກໄປເຮັດວຽກ ຢູ່ເມືອງອັນດອງ ສ ເກົາຫຼີ ແມ່ນໃຫ້ມາລົງທະບຽນ ຢູ່ຫ້ອງການແຮງງານ ແລະ ສະຫວັດດີການສັງຄົມເມືອງ ແຕ່ນີ້ຮອດວັນທີ 15 ມິຖຸນາ 2023; ເຊິ່ງຈໍານວນແຮງງານທີ່ຕ້ອງການໃນຄັ້ງນີ້: ເມືອງໄຊຍະບູລີ 50 ຄົນ, ຍິງ 30 ຄົນ; ເມືອງພຽງ 50 ຄົນ, ຍິງ 25 ຄົນ ແລະ ເມືອງຄອບ 50 ຄົນ, ຍິງ 30 ຄົນ; ການເປີດສະຫມັກຮັບລົງທະບຽນ ເພື່ອຄັດເລືອກ ແຕ່ລະເມືອງໃຫ້ໄດ້ຢ່າງນ້ອຍ 60 ຄົນ, ຍິງ 35 ຄົນ ຂື້ນໄປ.

2. ເພື່ອເຮັດໃຫ້ຂະບວນການຮັບສະຫມັກ ແລະ ຄັດເລືອກເອົາແຮງງານ ມີຄວາມສະດວກ, ໂປ່ງໃສ ແລະ ຖືກຕ້ອງ ຕາມລະບຽບການທີ່ໄດ້ກໍານົດໄວ້ ແມ່ນໃຫ້ແຮງງານທີ່ຕ້ອງການໄປເຮັດວຽກດັ່ງກ່າວ ຕ້ອງໄດ້ມາຂຶ້ນທະບຽນລາຍຊື່ ຢູ່ ຫ້ອງການແຮງງານ ແລະ ສະຫວັດດີການສັງຄົມເມືອງ ເພື່ອສໍາພາດຄັດເລືອກເອົາຜູ້ທີ່ມີເງື່ອນໄຂຄົບຖ້ວນ, ສໍາລັບ ແບບຟອມການສະຫມັກ ທາງກົມການຈັດຫາງານ ແລະ ບໍລິສັດທີ່ຮັບຜິດຊອບນໍາສົ່ງແຮງງານຈະແຈກຢາຍໃນມື້ສໍາພາດ , ສ່ວນການມາລົງທະບຽນ ແລະ ມາສໍາພາດເພື່ອຄັດເລືອກ ແມ່ນຈະບໍ່ໄດ້ເສຍຄ່າໃຊ້ຈ່າຍ.

3. ກໍລະນີຫາກມີພົບເຫັນບຸກຄົນ ຫຼື ນິຕິບຸກຄົນ ມາເຄື່ອນໄຫວຂົນຂວາຍເອົາແຮງງານໄປເຮັດວຽກ ຢູ່ ສ ເກົາຫຼີ ໂດຍບໍ່ມີຫນັງສືອະນຸຍາດຈາກພະແນກແຮງງານ ແລະ ສະຫວັດຕິການສັງຄົມແຂວງ ແມ່ນແຈ້ງໃຫ້ເຈົ້າຫນ້າທີ່ ທີ່ກ່ຽວຂ້ອງ ປະຕິບັດມາດຕະການ ຕໍ່ພາກສ່ວນດັ່ງກ່າວໂດຍທັນທີ ເພື່ອສະກັດກັ້ນບໍ່ໃຫ້ ມີນາຍຫນ້າ ເຂົ້າມາມີສ່ວນຮ່ວມໃນຂະບວນ ການຄັດເລືອກແຮງງານຄັ້ງນີ້ຢ່າງເດັດຂາດ

ສະແດງຄຳຄິດເຫັນ