ດວງ-Tou-Vientianepost - 2023-07-13T112228.470
ເກົາຫລີ ມອບອຸປະກອນຝຶກຊ້ອມໃຫ້ສະຫະພັນກິລາມວຍສາກົນແຫ່ງຊາດລາວ ມູນຄ່າ 311 ລ້ານກວ່າກີບ
ຮຽບຮຽງໂດຍ:Staff
ເຜີຍແຜ່: 13 ເດືອນກໍລະກົດ, 2023
ໝວດ: ກິລາ

ສະຫະພັນມວຍສາກົນແຫ່ງຊາດລາວ ຮ່ວມມືກັບ ຫ້ອງການສົ່ງເສີມກິລາມວຍ ຈາກ ສ.ເກົາຫລີ ແລະ ສະໂມສອນກິລາມວຍ ສ.ເກົາຫລີ ປະຈຳສປປ ລາວ ຈະສົ່ງເສີມການພັດທະນາວົງການກິລາມວຍສາກົນລາວ ເພື່ອກ້າວສູ່ສັງວຽນລະດັບອະນຸພາກພື້ນ, ພາກພື້ນ ແລະ ສາກົນ ໃນໄລຍະ 2 ປີ ລະຫວ່າງປີ 2023-2024 ໂດຍທາງຫ້ອງການສົ່ງເສີມກິລາມວຍ ສ.ເກົາຫລີ ໄດ້ມອບອຸປະກອນມວຍ ເຊັ່ນ ນວມຊົກ 16 ຄູ່, ເປົ້າລໍ້ 5 ຄູ່ ແລະ ກະເປົາຊ້ອມ 16 ຄູ່ ລວມມູນຄ່າ 311 ລ້ານກວ່າກີບ ຫລື 16.200 ໂດລາສະຫະລັດ ພ້ອມຈະຕ້ອນຮັບນັກກິລາມວຍສາກົນລາວ ໄປຝຶກແອບຢູ່ທີ່ປະເທດ ສ.ເກົາຫລີ ອີກດ້ວຍ.

ພິທີເຊັນສັນຍາການຮ່ວມມືກັນໃນຄັ້ງນີ້ ໄດ້ມີຂຶ້ນເມື່ອວັນທີ 11 ກໍລະກົດ 2023 ທີ່ຫ້ອງການຄະນະກຳມະການໂອແລມປິກແຫ່ງຊາດລາວ ຫລື ຄອລ ລະຫວ່າງ ທ່ານ ສົມພອນ ມະນີຄຳ ເລຂາທິການສະຫະພັນມວຍສາກົນແຫ່ງຊາດລາວ, ທ່ານ ວູຢອງ ຄິມ ຕົວແທນຈາກຫ້ອງການສົ່ງເສີມກິລາມວຍ ຈາກ ສ.ເກົາຫລີ ແລະ ທ່ານ ມິນຊອງໂຈ ປະທານສະໂມສອນກິລາມວຍ ເກົາຫລີ ປະຈຳສປປ ລາວ, ມີທ່ານ ສີສຸພັນ ແສງສະຫວັນ ປະທານສະຫະພັນມວຍສາກົນແຫ່ງຊາດລາວ ແລະ ທ່ານ ຢູ ມະຢອງກູ (Yu myeongu) ອະດີດນັກຊົກມວຍແຊ໋ມປ້ຽນໂລກ ປີ 1986 ຕະຫລອດຮອດພະນັກງານທີ່ກ່ຽວຂ້ອງທັງສາມພາກສ່ວນ ແລະ ສື່ມວນຊົນເຂົ້າຮ່ວມເປັນສັກຂີພິຍານ.

ໂອກາດນີ້, ທ່ານ ສົມພອນ ມະນີຄຳ ກ່າວໃຫ້ຮູ້ວ່າ: ການຮ່ວມມືກັນດັ່ງກ່າວ ແມ່ນຈະໄດ້ພ້ອມກັນຂຶ້ນແຜນການຝຶກຊ້ອມປະຈຳປີ ແລະ ການແຂ່ງຂັນແລກປ່ຽນກັນເປັນປົກກະຕິ, ການສະໜັບສະໜູນແຕ່ລະສະໂມສອນ, ການຮ່ວມມືດ້ານທຸລະກິດກິລາມວຍ, ການຮ່ວມມືດ້ານມະນຸດສະທຳ ແລະ ການສະໜັບສະນູນງົບປະມານທາງດ້ານການຈັດການແຂ່ງຂັນປະຈຳປີ ຊຶ່ງມີທັງໝົດ 2 ລາຍການ ກໍຄື ລາຍການຊີງຂັນປະທານສະຫະພັນມວຍສາກົນແຫ່ງຊາດລາວ ແລະ ການແຂ່ງຂັນມວຍສາກົນ ຊີງຊະນະເລີດທົ່ວປະເທດ ໂດຍທັງໝົດນີ້ແມ່ນມີຈຸດປະສົງເພື່ອສົ່ງເສີມການພັດທະນາວົງການກິລາມວຍສາກົນລາວ ເພື່ອກ້າວສູ່ຜົນສຳເລັດໃນສັງວຽນລະດັບອະນຸພາກພື້ນ, ພາກພື້ນ ແລະ ສາກົນ ໂດຍສະເພາະຈະກຽມຄວາມພ້ອມສົ່ງທັບນັກກິລາມວຍສາກົນທີມຊາດລາວ ຈຳນວນ 4 ຄົນ, ໃນນັ້ນ ສຳຮອງແມ່ນນັກກິລາຍິງມີ 1 ຄົນ ຊຶ່ງລໍຖ້າໂຄຕ້າ ເພື່ອເຂົ້າຮ່ວມການແຂ່ງຂັນໃນງານມະຫະກຳກິລາເອຊຽນ ເກມ ທີ່ເມືອງຫາງໂຈວ ສປ ຈີນ ເປັນເຈົ້າພາບ ໃນເດືອນສິງຫານີ້.

ໃນພິທີເຊັນສັນຍາດັ່ງກ່າວ ທ່ານ ວູຢອງ ຄິມ ຕົວແທນຈາກຫ້ອງການສົ່ງເສີມກິລາມວຍ ສ.ເກົາຫລີ ກໍຍັງໄດ້ນຳເອົາອຸປະກອນມວຍ ປະກອບມີ ນວມຊົກ 16 ຄູ່, ເປົ້າລໍ້ 5 ຄູ່ ແລະ ກະເປົາຊ້ອມ 16 ຄູ່ ລວມມູນຄ່າ 311 ລ້ານກວ່າກີບ ຫລື 16.200 ໂດລາສະຫະລັດ ມາມອບໃຫ້ສະຫະພັນກິລາມວຍສາກົນແຫ່ງຊາດລາວ ເພື່ອນຳໄປພັດທະນານັກກິລາມວຍສາກົນລາວ ເພື່ອກຽມຄວາມພ້ອມຮອບດ້ານໃນການເຂົ້າຮ່ວມແຂ່ງຂັນມວຍສາກົນລະດັບພາກພື້ນ ແລະ ສາກົນ ໃນຕໍ່ໜ້າອີກດ້ວຍ.

ທີ່ມາ: ຂ່າວກິລາ ລາວພັດທະນາ Laophattana Sport News

ສະແດງຄຳຄິດເຫັນ

ຂ່າວມາໃໝ່ 
2
ນາຍົກ ຈະເຂົ້າຮ່ວມກອງປະຊຸມ ເວທີປຶກສາຫາລື ອະນາຄົດອາຊຽນ
2
ປະທານປະເທດ ແຫ່ງ ສປປ ລາວ ຈະເດີນທາງຢ້ຽມຢາມ ກຳປູເຈຍ ເພື່ອເພີ່ມທະວີ ແລະ ຮັດແໜ້ນສາຍພົວພັນມິດຕະພາບ
2
ກຳປູເຈຍ ສົ່ງອອກລົດຖີບ ຫລຸດລົງ 43%
2
ສປຈີນ ຈັດສັນງົບປະມານ ຊຸກຍູ້ການລົງທຶນ ຫລາຍກວ່າ 2 ແສນລ້ານຢວນ
2
ສປຊ ຮຽກຮ້ອງໃຫ້ຄວາມຊ່ວຍເຫຼືອເຂດກາຊາ ຈຳນວນ ເງິນ 2,8 ຕື້ໂດລາ
2
ໄອເອັມເອຟ (IMF) ຍົກລະດັບການຄາດການອັດຕາການເຕີບໂຕເສດຖະກິດໂລກໃນປີ 2024
2
ສສ ຫວຽດນາມ ນອນໃນກຸ່ມແຖວໜ້າອາຊີ ກ່ຽວກັບການລົງທຶນພື້ນຖານໂຄງລ່າງ
2
ການຂຸດຄົ້ນບໍ່ແຮ່ ເປັນຂະແໜງການສຳຄັນ ແລະ ເປັນແມ່ແຮງ ດຶງດູດການລົງທຶນມາ ແຂວງຫົວພັນ
2
ປະເທດລາວມີແຫຼ່ງຜະລິດໄຟຟ້າ 97 ແຫ່ງທີ່ຂາຍເຂົ້າລະບົບລັດວິສາຫະກິດໄຟຟ້າລາວ
2
ທຳລາຍສວນປູກຝິ່ນ 5 ເຮັກຕາກວ່າ ຢູ່ເມືອງລອງ ແຂວງຫຼວງນ້ຳທາ
ຢ່າລື່ມກົດຕິດຕາມ