ແຫລ່ງຂ່າວຈາກ ແຂວງຄໍາມ່ວນ ໃຫ້ຮູ້ວ່າ: ວັນທີ 16 ສິງຫາ 2023 ນີ້, ທ່ານ ວົງເພັດ ຈິດປັນຍາ ຮອງເລຂາພັກແຂວງ, ຜູ້ຊີ້ນໍາວຽກການເມືອງ-ແນວຄິດ, ວຽກພັກ-ພະນັກງານ ແຂວງຄໍາມ່ວນ ຕາງໜ້າອຳນາດການປົກຄອງຂອງແຂວງ ພ້ອມດ້ວຍຄະນະ ລົງຢ້ຽມຢາມ ເພື່ອໃຫ້ກຳລັງໃຈແກ່ພໍ່ແມ່ປະຊາຊົນ ທີ່ຖືກຜົນກະທົບຈາກໄພພິບັດ (ນໍ້າຖ້ວມ) ຢູ່ເມືອງຄູນຄໍາ, ພ້ອມທັງມອບເຄື່ອງອຸປະໂພກ-ບໍລິໂພກ ລວມມູນຄ່າ 211 ລ້ານກວ່າກີບ ໃຫ້ແກ່ປະຊາຊົນ 3 ບ້ານ, 365 ຄອບຄົວ ທີ່ໄດ້ຮັບຜົນກະທົບ ໃນນັ້ນ, ປະກອບມີ: ບ້ານແກ້ງ 142 ຄອບຄົວ, ບ້ານໂພນແຍງ 137 ຄອບຄົວ ແລະ ບ້ານນາຄໍາ 86 ຄອບຄົວ ເພື່ອຊ່ວຍເຫລືອບັນເທົາທຸກໃນເບື້ອງຕົ້ນ.

ທ່ານ ວົງເພັດ ຈິດປັນຍາ ໄດ້ສະແດງຄວາມເປັນຫ່ວງເປັນໄຍຕໍ່ພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກເຫດການດັ່ງກ່າວ, ຕໍ່ກັບເຫດການນໍ້າຖ້ວມຄັ້ງນີ້ ການນໍາພັກ,ລັດ ແຕ່ລະຂັ້ນ ບໍ່ໄດ້ນິ້ງນອນໃຈ ນັບຕັ້ງແຕ່ມື້ເກີດເຫດ ການນໍາຂັ້ນແຂວງກໍໄດ້ລົງມາຊີ້ນຳບັນຊາ, ພ້ອມທັງສຸມກຳລັງພົນຈາກບັນດາກົມກອງ ແລະ ພາຫະນະ, ອຸປະກອນຕ່າງໆ ລົງມາຊ່ວຍເຫລືອເຄື່ອນຍ້ານປະຊາຊົນອອກໄປຢູ່ໃນຈຸດທີ່ປອດໄພ, ພ້ອມທັງໄດ້ລະດົມວັດຖຸ-ປັດໄຈ ຈາກບັນດາບໍລິສັດ, ຫ້າງຮ້ານ ແລະ ພາກສ່ວນຕ່າງໆໃນສັງຄົມ ເພື່ອມາຊ່ວຍເຫລືອບັນເທົາທຸກໃນເບື້ອງຕົ້ນ.

ມາຮອດປັດຈຸບັນ, ສະພາບນໍ້າຖ້ວມກໍໄດ້ຫລຸດຜ່ອນລົງ ແຕ່ທີ່ຍັງເປັນຫ່ວງ ກໍຄື ສະພາບດຳລົງຊີວິດ ການເປັນຢູ່ຂອງປະຊາຊົນ ເຊິ່ງບ້ານຕ່າງໆແມ່ນຍັງບໍ່ມີໄຟຟ້າໃຊ້ ເນື່ອງຈາກເສົາໄຟຟ້າ ໄດ້ຖືກດິນເຈື່ອນຫັກຕົກລົງເຫວຫລາຍຈຸດ ເຊັ່ນ: ຢູ່ຈຸດພູໄຮ ບໍ່ສາມາດສົ່ງໄຟຟ້າມາໃຫ້ພໍ່ແມ່ປະຊາຊົນໄດ້ ເຊິ່ງການນໍາ ພັກ, ລັດ ກໍພະຍາຍາມເລັ່ງໃສ່ຊອກຫາວິທີແກ້ໄຂຢູ່. ພ້ອມນີ້, ກໍສະເໜີໃຫ້ປະຊາຊົນ ຄົ້ນຄວ້າຜະລິດກະສິກຳ, ປູກພືດໄລຍະສັ້ນປະເພດຕ່າງໆ ທົດແທນຜົນຜະລິດທີ່ເສຍຫາຍ ເພື່ອແກ້ໄຂຊີວິດການເປັນຢູ່ປະຈໍາວັນ. ສ່ວນແນວພັນ ໃຫ້ເກັບກຳຂໍ້ມູນ ຄວາມຕ້ອງການ ແລ້ວສະເໜີໄປຍັງຂະແໜງທີ່ກ່ຽວຂ້ອງ ຂັ້ນເມືອງ, ຂັ້ນແຂວງ ຄົ້ນຄວ້າຕອບສະໜອງແນວພັນພືດຕ່າງໆ. ນອກນີ້, ກໍໃຫ້ເອົາໃຈໃສ່ປັນຫາດ້ານສຸຂະພາບ ໂດຍ ໃຫ້ການຈັດຕັ້ງບ້ານຕິດຕາມກ່ຽວກັບພະຍາດ ທີ່ອາດຈະເກີດຂຶ້ນພາຍຫລັງທີ່ນໍ້າບົກແຫ້ງ, ກໍລະນີພົບເຫັນແມ່ນໃຫ້ຮີບຮ້ອນລາຍງານ ເພື່ອວາງແຜນຕອບໂຕ້ແກ້ໄຂໃຫ້ທັນກັບສະພາບການ.ໂອກາດນີ້, ທ່ານຮອງເລຂາພັກແຂວງ ຍັງໄດ້ໄປຕິດຕາມເບິ່ງສະພາບຈຸດເກີດເຫດດິນເຈື່ອນຖົມເສັ້ນທາງຢູ່ເຂດພູໄຮ ຕື່ມອີກ.

ສະແດງຄຳຄິດເຫັນ