ແຂວງໄຊສົມບູນອອກແຈ້ງການເຂັ້ມງວດ ຕ້ອງຈ່າຍຄ່າໄຟເມື່ອໄດ້ຮັບບິນ ບໍ່ຈ່າຍຈະຖືກງົດໃຊ້ໄຟ
ໄຟຟ້າລາວແຂວງໄຊສົມບູນອອກແຈ້ງການເຂັ້ມງວດ ຕ້ອງຈ່າຍຄ່າໄຟເມື່ອໄດ້ຮັບບິນ ບໍ່ຈ່າຍຄ່າໄຟ ຈະຖືກງົດໃຊ້ໄຟຊົ່ວຄາວ
ວັນທີ 19 ເມສາ 2023 ຜ່ານມານີ້ ລັດວິສາຫະກິດໄຟຟ້າລາວ ສາຂາແຂວງໄຊສົມບູນອອກແຈ້ງການການປະຕິບັດ ສິດ, ພັນທະຜູ້ຊົມໃຊ້ ແລະ ມາດຕະການຕໍ່ຜູ້ມີໜີ້ຄ້າງຄ່າກະແສໄຟຟ້າ ໂດຍປະຕິບັດຕາມກົດຫມາຍໄຟຟ້າ (ສະບັບປັບປຸງ) ສະບັບເລກທີ່ 19/ສພຊ, ນະຄອນຫຼວງວຽງຈັນ, ລົງວັນທີ 9 ພຶດສະພາ 2017, ມາດຕາ 91 ວ່າດ້ວຍສິດ ແລະ ພັນທະຂອງຜູ້ຊົມໃຊ້ໄຟຟ້າ (ຂໍ້ທີ່
1) ແລະ ມາດຕາ 92 ວ່າດ້ວຍສິດ ແລະ ພັນທະຂອງຜູ້ຊົມໃຊ້ໄຟຟ້າ (ຂໍ້ທີ່ 4 ) ວ່າດ້ວຍການປະຕິບັດລະບຽບ ຕໍ່ຜູ້ບໍ່ປະຕິບັດພັນທະ ເຊິ່ງມີລາຍລະອຽດດັ່ງນີ້:ການຊໍາລະຄ່າໄຟຟ້າເດືອນຕາມກົນໄກການດໍາເນີນທຸລະກິດ ຂອງໄຟຟ້າລາວ, ຕໍ່ຜູ້ຊົມໃຊ້ໄຟຟ້າຕ້ອງຊໍາລະຄ່າໄຟຟ້າທຸກໆ ເດືອນພາຍຫຼັງທີ່ໄດ້ຮັບໃບບິນແຈ້ງຄ່າໄຟຟ້າ.
ກໍລະນີລູກຄ້າທ່ານໃດບໍ່ຊໍາລະ, ມີໜີ້ຄ້າງເກີນກໍານົດທີ່ກ່າວມາຂ້າງເທິງນີ້, ລັດວິສາຫະກິດໄຟຟ້າລາວ ສາຂາແຂວງໄຊສົມບູນຈະໄດ້ງົດກະແສໄຟຟ້າຊົ່ວຄາວຂອງຜູ້ຊົມໃຊ້ດັ່ງກ່າວຕາມລະບຽບການ ຂອງ ຟຟລ.
ຫຼັງຈາກງົດໄຟແລ້ວ, ກ່ອນຈະຕໍ່ໄຟຟ້າຄືນໃຫ້ ລູກຄ້າຕ້ອງຈ່າຍໜີ້ຄ່າກະແສໄຟຟ້າທີ່ຄ້າງ ແລະ ຊໍາລະຄ່າບໍລິການຕັດຕໍ່ໄຟຟ້າຄືນຕາມລະບຽບການຄິດໄລ່ຄ່າບໍລິການ ສໍາລັບຜູ້ທີ່ຖືກງົດສົ່ງໄຟຟ້າຊົ່ວຄາວ ເນື່ອງຈາກມີໜີ້ຄ້າງ ດັ່ງລຸ່ມນີ້:ຄ່າລະບຽບຕໍ່ໄຟຄືນເຊັ່ນ:
ສໍາລັບປະເພດໝໍ້ນັບໄຟໃນລະບົບແຮງຕໍ່າ 220 V ເປັນເງິນຈໍານວນ 50.000 ກີບ/ຄັ້ງ/ໜ່ວຍ ສໍາລັບປະເພດໝໍ້ນັບໄຟໃນລະບົບແຮງຕໍ່າ 380V ເປັນຈໍານວນເງິນ 100.000 ກີບ/ຄັ້ງ/ໜ່ວຍ
ສໍາລັບໝໍ້ນັບໄຟໃນລະບົບແຮງກາງ CT 0,4 kV ແລະ CT.PT 22 kV ເປັນຈໍານວນເງິນ 1.000.000 ກີບ/ຄັ້ງ/ໜ່ວຍ (ຜົນກະທົບທີ່ເກີດຂຶ້ນຈາກການງົດກະແສໄຟຟ້າຊົ່ວຄາວ ແມ່ນຜູ້ຊົມໃຊ້ໄຟ ເປັນຜູ້ຮັບຜິດຊອບເອງທັງຫມົດພຽງຜູ້ດຽວ).
ທ່ານສາມາດຊໍາລະເງິນຄ່າກະແສໄຟຟ້າໄດ້ ທີ່ປ່ອງບໍລິການຮັບເງິນຄ່າກະແສໄຟຟ້າ ຂອງແຕ່ລະສູນບໍລິການເມືອງ, ຫຼື ທ່ານ ສາມາດຊໍາລະ ຜ່ານລະບົບ Mobile Bank, ຕູ້ ATM ແລະ ປ່ອງບໍລິການທະນາຄານຕ່າງໆ.ດັ່ງນັ້ນ, ຈຶ່ງແຈ້ງມາຍັງທ່ານ ຜູ້ຊົມໃຊ້ໄຟຟ້າ ທົ່ວ ແຂວງໄຊສົມບູນ ຈົ່ງຮັບຮູ້ ແລະ ເຂົ້າໃຈພ້ອມກັນຈັດຕັ້ງປະຕິບັດດ້ວຍ.
