ທ່ານ ດຣ. ສະໜອງ ທອງຊະນະ ກ່າວໃນກອງປະຊຸມສໍາມະນາກ່ຽວກັບຜົນຮ້າຍຂອງຢາສູບໄຟຟ້າ ແລະ ວັນງົດຢາສູບໂລກ ໃນວັນທີ 19 ພຶດສະພາ 2023 ຜ່ານມານີ້ວ່າ: ຢາສູບແມ່ນຜະລິດຕະພັນພິເສດ ເປັນສິນຄ້າເສບຕິດຊະນິດດຽວທີ່ຍັງຖືກກົດໝາຍ ແຕ່ເຮັດໃຫ້ຜູ້ບໍລິໂພກເປັນພະຍາດຮ້າຍແຮງ, ພິການ ແລະ ເສຍຊີວິດກ່ອນໄວອັນຄວນ ວຽກງານຄວບຄຸມຢາສູບ ແມ່ນວຽກງານໜຶ່ງທີ່ມີຄວາມທ້າທາຍສົມຄວນ ແລະ ເປັນວຽກທີ່ຫຼາຍຂະແໜງການຕ້ອງໄດ້ຈັດຕັ້ງປະຕິບັດ ແລະ ຮັບຜິດຊອບຮ່ວມກັນ.

ເຖິງຢ່າງໃດກໍຕາມ ບໍລິສັດຢາສູບຍັງໄດ້ນຳໃຊ້ກົນອຸບາຍຕ່າງໆ ເພື່ອເບື່ອເມົາເຍົາວະຊົນ-ຊາວໜຸ່ມ ໂດຍການຫັນເອົາເທັກໂນໂລຊີທີ່ທັນສະໄໝ ມາຕິດພັນກັບຜະລິດຕະພັນຢາສູບຮູບແບບໃໝ່ ຢາສູບໄຟຟ້າ ໄດ້ກາຍເປັນທີ່ນິຍົມຂອງເຍົາວະຊົນ-ຊາວໜຸ່ມໃນປັດຈຸບັນ.

ລາຄາຢາສູບໃນ ສປປ ລາວ ກໍຄືອາກອນຢາສູບຍັງຕໍ່າຫຼາຍ ເມື່ອທຽບໃສ່ບັນດາປະເທດອາຊຽນ ສົນທິສັນຍາສາກົນວ່າດ້ວຍ ການຄວບຄຸມຢາສູບໄດ້ແນະນຳໄວ້ວ່າ ຕ້ອງເຮັດໃຫ້ລາຄາຢາສູບແພງຂຶ້ນ ເພື່ອປົກປ້ອງຜູ້ລິເລີ່ມສູບຢາໃໝ່ ແລະ ຜູ້ສູບຢາທີ່ມີລາຍຮັບຕໍ່າ ໂດຍເພີ່ມອາກອນຢາສູບໃຫ້ສູງເທົ່າທີ່ຄວນ ຈຶ່ງຈະສາມາດຫຼຸດຜ່ອນການບໍລິໂພກຢາສູບ ລວມທັງປົກປ້ອງຜູ້ສູບຢາໜ້າໃໝ່ ແຕ່ເນື່ອງ

ຈາກສັນຍາການລົງທຶນໃນກິດຈະການຢາສູບ (ILA) ເປັນເວລາ 25 ປີ ເຮັດໃຫ້ບໍ່ສາມາດຈັດເກັບອາກອນຕາມທີ່ກົດໝາຍກຳນົດ ເຊິ່ງເປັນສິ່ງທ້າທາຍສຳລັບລັດຖະບານເຮົາ ເພາະສັນຍາສະບັບດັ່ງກ່າວ ຈະສິ້ນສຸດລົງໃນປີ 2026 ແລະ ອີກ 24 ເດືອນກ່ອນທີ່ສັນຍາຈະສິ້ນສຸດ ລັດຖະບານຈະຕ້ອງໄດ້ແຈ້ງໄປຍັງບໍລິສັດຢາສູບ ພ້ອມດ້ວຍເງື່ອນໄຂໃນການໃຫ້ຕໍ່ ຫຼື ບໍ່ໃຫ້ຕໍ່ສັນຍາສະບັບດັ່ງກ່າວ ບໍ່ດັ່ງນັ້ນ

ສັນຍາຈະຖືກຕໍ່ຢ່າງອັດຕະໂນມັດອີກ ເປັນເວລາ 25 ປີ ສັນຍາສະບັບດັ່ງກ່າວ ໄດ້ສ້າງຜົນເສຍຫາຍທາງດ້ານສຸຂະພາບ ແລະ ເສດຖະກິດ ທີ່ເກີດຈາກສັນຍາການລົງທຶນໃນກິດຈະການຢາສູບຂອງລັດ ແລະ ລັດຈະໄດ້ຫຍັງຖ້າຕໍ່ສັນຍານີ້ ໂດຍບໍ່ມີການປັບປຸງຊ່ອງວ່າງ ເຊິ່ງລັດຕ້ອງຕັດສິນໃຈ ແລະ ແຈ້ງຕໍ່ບໍລິສັດກ່ອນ 31 ທັນວາ 2024.

ທີ່ມາ ໜັງສືພິມວຽງຈັນທາຍ

ສະແດງຄຳຄິດເຫັນ