ວັນທີ 13-16 ມິຖຸນາ 2023, ອົງການກວດກາແຫ່ງລັດ ແລະ ຕ້ານການສໍ້ລາດບັງຫລວງຂັ້ນສູນກາງ ຮ່ວມກັບ ອົງການສະຫະປະຊາຊາດ ເພື່ອຕ້ານຢາເສບຕິດ ແລະ ອາຊະຍາກໍາ (UNODC) ໄດ້ຈັດຊຸດຝຶກອົບຮົມວຽກງານຕ້ານການສໍ້ລາດບັງຫລວງ ໃນໂຄງການກໍ່ສ້າງພື້ນຖານໂຄງລ່າງ.

ທ່ານ ສູນທະລາ ເຂັມພິລາດ ຮອງຫົວໜ້າກົມພົວພັນຕ່າງປະເທດ ອົງການກວດກາແຫ່ງລັດ ແລະ ຕ້ານການສໍ້ລາດບັງຫລວງຂັ້ນສູນກາງ ກ່າວວ່າ: ເພື່ອເປັນໂອກາດດີທີ່ໄດ້ຮໍ່າຮຽນບົດຮຽນອັນໃໝ່ ແລະ ປະສົບການຕົວຈິງ ກ່ຽວກັບວຽກງານຕ້ານການສໍ້ລາດບັງຫລວງ, ວຽກງານສືບສວນສອບສວນ ໂດຍລົງເລິກການຕ້ານການສໍ້ລາດບັງຫລວງ ໃນໂຄງການກໍ່ສ້າງພື້ນຖານໂຄງລ່າງ ແລະ ບັນຫາອື່ນໆຈາກຄະນະຊ່ຽວຊານລະດັບສູງຂອງສາກົນ ແລະ ຂອງ ສປປ ລາວ.

ສຳມະນາກອນທີ່ເຂົ້າຝຶກອົບຮົມໄດ້ຮຽນຮູ້ ການສືບສວນ-ສອບສວນທາງການເງິນ; ການສືບສວນ-ສອບສວນບັນດາບໍລິສັດ ແລະ ກອງທຶນ; ການສົມຍອມການສະເໜີລາຄາຈັດຊື້-ຈັດຈ້າງທາງພາກລັດ; ການຕ້ານການສໍ້ລາດບັງຫລວງໃນໂຄງການກໍ່ສ້າງພື້ນຖານໂຄງລ່າງ ລວມມີ: ການກວດສອບການປະຕິບັດໂຄງການ ແລະ ການປະເມີນໂຄງການ, ການກວດຫາການສໍ້ໂກງ, ການສໍ້ລາດບັງຫລວງໃນໄລຍະການປະຕິບັດໂຄງການ ແລະ ຮູບແບບການສໍ້ໂກງ, ວິທີການ ແລະ ບາດກ້າວສຳລັບການແກ້ໄຂການສໍ້ໂກງພາຍໃນໂຄງການ, ວິທີການສຳລັບການເກັບກູ້ຊັບສິນຄືນຈາກການສໍ້ລາດ

ບັງຫລວງພາຍໃນໂຄງການ ໃນກໍລະນີມີການນຳໃຊ້ຊັບສິນໄປໃນທາງທີ່ບໍ່ຖືກຕ້ອງເພື່ອຜົນປະໂຫຍດສ່ວນຕົວ ຫລື ການນຳໃຊ້ແຫລ່ງຊັບພະຍາກອນໃນແນວທາງອື່ນ ທີ່ບໍ່ຖືກຕ້ອງແລະເໝາະສົມ ທັງພາຍໃນ ແລະ ຕ່າງປະເທດ, ວຽກງານສະກັດກັ້ນ ແລະ ຕ້ານການສໍ້ລາດບັງຫລວງ, ວຽກງານສືບສວນ-ສອບສວນຄະດີການສໍ້ລາດບັງຫລວງ,

ສະນັ້ນ, ເພື່ອບັນລຸຈຸດປະສົງຄາດໝາຍຂອງການຝຶກອົບຮົມໄດ້ຮຽກຮ້ອງໃຫ້ສໍາມະນາກອນ ຮູ້ກໍາແໜ້ນບົດຮຽນ ແລ້ວນໍາໄປຈັດຕັ້ງປະຕິບັດຕົວຈິງ ໃຫ້ມີປະສິດທິພາບ, ປະສິດທິຜົນສູງ ເພື່ອສ້າງບາດກ້າວໃໝ່ທາງດ້ານຈິນຕະນາການ ເພື່ອນໍາໄປໜູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕາມເງື່ອນໄຂຕົວຈິງ ຂອງແຕ່ລະພາກສ່ວນ.

ການຝຶກອົບຮົມຄັ້ງນີ້ ໂດຍການເປັນປະທານຮ່ວມຂອງ ທ່ານ ສູນທະລາ ເຂັມພິລາດ ຮອງຫົວໜ້າກົມພົວພັນຕ່າງປະເທດ ອົງການກວດກາແຫ່ງລັດ ແລະ ຕ້ານການສໍ້ລາດບັງຫລວງຂັ້ນສູນກາງ ແລະ ທ່ານ ນາງ ນິຊານີ ວົງບາ ເຈົ້າໜ້າທີ່ຕ້ານການສໍ້ລາດບັງຫລວງ ອົງການ UNODC ປະຈໍາພາກພື້ນທີ່ຣາຊະອານາຈັກໄທ.

ສະແດງຄຳຄິດເຫັນ