ໃນປີ 2024 ລັດຖະບານຕັ້ງເປົ້າໝາຍສູ້ຊົນ 11 ຄາດໝາຍໃນຂະແໜງສາທາລະນະສຸກ ໂດຍສູ້ຊົນອັດຕາຊົມໃຊ້ນໍ້າສະອາດ ໃຫ້ໄດ້ 94% ປະຊາກອນເປົ້າໝາຍ.
ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ໄດ້ກ່າວໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ຜ່ານມາວ່າ: ໃນແຜນພັດທະນາເສດຖະກິດ-ສັງຄົມ ໃນປີ 2024 ຄາດໝາຍຂົງເຂດວັດທະນະທຳ-ສັງຄົມ ສະເພາະແມ່ນ ວຽກງານສາທາລະນະສຸກ ໄດ້ຕັ້ງເປົ້າໝາຍສູ້ຊົນດັ່ງນີ້:

1) ອັດຕາສ່ວນເດັກນ້ອຍລຸ່ມ5ປີ ທີ່ມີນໍ້າໜັກຕໍ່າກວ່າມາດຕະຖານ ໃຫ້ຍັງຫຼືອ 16% ຂອງປະຊາກອນໃນເປົ້າໝາຍ;
2). ອັດຕາສ່ວນເດັກນ້ອຍ ລຸ່ມ 5 ປີ ທີ່ມີລວງສູງຕໍ່າກວ່າມາດຕະຖານ ໃຫ້ຍັງເຫຼືອ 28% ຂອງປະຊາກອນໃນເປົ້າໝາຍ;
3). ອັດຕາການຕາຍຂອງເດັກລຸ່ມ 1 ປີ ໃຫ້ຍັງເຫຼືອ 22/1.000 ເດັກເກີດມີຊີວິດ;
4). ອັດຕາການຕາຍຂອງເດັກລຸ່ມ 5 ປີ ໃຫ້ຍັງເຫຼືອ 32/1.000 ເດັກເກີດມີຊີວິດ;
5). ອັດຕາສ່ວນການຕາຍຂອງແມ່ ໃຫ້ຍັງເຫຼືອ 120/100.000 ເດັກເກີດມີຊີວິດ;
6). ອັດຕາການເກີດລູກມີແພດຊ່ວຍ ໃຫ້ໄດ້ 84% ປະຊາກອນເປົ້າໝາຍ;
7). ອັດຕາການໃຫ້ວັກຊິນກັນພະຍາດໃນເດັກ ລຸ່ມ 1 ປີ ໃຫ້ໄດ້ 95% ປະຊາກອນເປົ້າໝາຍ;
8). ອັດຕາຊົມໃຊ້ນໍ້າສະອາດ ໃຫ້ໄດ້ 94% ປະຊາກອນເປົ້າໝາຍ;
9). ອັດຕາການຊົມໃຊ້ວິດຖ່າຍຄອບຄົວ ໃຫ້ໄດ້ 84% ຂອງຄອບຄົວທັງໝົດ;
10). ອັດຕາການປົກຄຸມປະກັນສຸຂະພາບ ໃຫ້ໄດ້ 94,5% ຂອງປະຊາກອນທັງໝົດ;
11). ອັດຕາການຮັບຮອງ ແລະປະກາດເປັນບ້ານສາທາລະນະສຸກແບບຢ່າງໃຫ້ໄດ້ 84% ຂອງບ້ານທັງໝົດ.

ຂໍຂອບໃຈ: ເນື້ອຫາແລະຮູບພາບຈາກ ຫນັງສືພິມຄວາມສະຫງົບ